Мин ырыа алыптаах эйгэтигэр уһуйуллуум «Кэнчээри» оҕо норуодунай ансаамбылыгар киириэхпиттэн саҕаламмыта. Манна мин саха, нуучча, омук композитордарын айымньыларын, саха норуотун ырыаларын кытта маҥнайгы билсиһиим буолбута. Академическайдыы 3-4 куолаһынан арааран, оннооҕор операттан быһа тардыылары толорорбут. Василий Степанович талааннаах оҕолору куоластарыгар дьүөрэлиир курдук соҕотоҕун толорорго эмиэ такайара: мин бэйэм «Дьиэрэҥкэй», «Төрөөбүт алааскын эн таптаа», «Степь да степь кругом», дьүөгэбинээн Люба Федотовалыын «Күөрэгэй» диэн ырыалары толорбуттаахпын. Алта сыл «Кэнчээри» кэрэ эйгэтигэр иитиллибит, Москва куораты аан бастаан көрбүт, «Артек» лааҕырга сынньаммыт оҕо сааһым умнуллубат дьоллоох кэмнэрэ буолаллар.
СР үтүөлээх артыыстара Анастасия Готовцева, Варя Аманатова, Анатолий Бурнашев Василий Степановичка иитиллэн, куорсун анньынан тахсыбыт норуот таптыыр ырыаһыттара буолаллар.
«Туймаада» государственнай ырыа ансаамбылыгар «Кэнчээриттэн» тахсыбыт Анастасия Готовцева, Вероника Михеева ыллаабыттара. Билигин Мария Максимова уонна мин ситиһиилээхтик үлэлии сылдьабыт. Бу икки ансаамбылы академическайдыы ыллааһын ситимниир.
«Кэнчээри» саха искусствотын республикаҕа эрэ буолбакка, Россияҕа уонна тас дойдуларга киэҥник тарҕаппыт ансаамбыл буолар. Манна сылдьыбыт оҕолор кэрэ эйгэни кэрэхсиир, сырдык дууһалаах, ырыа куттаах, араас дойду култууратын кытта билсэн ис таһымнара үрдээн, төрөөбүт дойдуларын таптыыр, дьон-сэргэ кэрэхсиир дьоно буолаллар.
Василий Степанович өр сыллар усталарыгар сылайбакка, дьүккүөрдээхтик үлэлээн оҕо иитиитигэр, саха ырыатын үрдүк таһымҥа таһаарарга сүҥкэн кылааты киллэрбит, үлэтигэр бэриниилээх, энтузиаст, фанат, дьон-сэргэ киэн туттар киһитэ буолар. Киниэхэ ис сүрэхтэн тахсар үрдүк махтал тылларын этэбин. Баҕарабын кытаанах доруобуйаны, айымньылаах үлэтигэр үрдүк ситиһиилэри, дьолу. Үөрэтэр оҕолоро кини кыһамньылаах үлэтин үтүө холобур оҥостон, бар дьон ытыктабылын ылар үлэһит буола үүннүннэр.
Лина Акимова,
СӨ үтүөлээх артыыһа, «Туймаада» государственнай ырыа ансаамбылын солистката
2015 сыл.