Мин 1997 сыллаахха Мүрү 1 оскуолатыгар үөрэнэ киирбитим. Начальнай кылааска музыка урогун таһынан хорга В.С. Парников эбии ыллатар этэ. Ыллыырбын олус сөбүлүүр этим, ол иһин үөрэх кэннэ хорга хаалын диэтэхтэринэ үөрэ-көтө хааларым. Онтон 6 кылааска үөрэнэ сылдьан, Василий Степановиhы көрсөммүн ансаамбылга сылдьыахпын баҕарабын диэн тылланан туран ансамбылга киирбитим. Нэдиэлэҕэ 3 дьарыктанар этибит. Улууспут нэhилиэктэригэр гастроллуур, сайын улуус, куорат ыhыахтарыгар куруутун кыттарбыт. Куорат ыhыаҕар палаточный городокка олорорбут, хас да күн атын ансаамбыллары кытары бэлэмнэнии буолар этэ.
2004 сыллаахха «Азия оҕолоро» омуктар икки ардыларынааҕы спорт оонньууларын культурнай программатыгар кыттыбыппыт.
2007 сыллаахха улуус оскуолаларын бастыҥ үөрэнээччилэрин кытары, мин Кэнчээрибэр старосталыы сылдьан, Президентскай ёлкаҕа сылдьыбыппыттан учууталбар Василий Степановичка махталым улахан.
Оскуоланы бүтэрбит сылбыт сайыныгар 2007 сыллаахха – Францияҕа ыытыллыбыт “Хрустальная Лира” Аан дойдутааҕы фестивальга фольклорга 1 степеннээх лауреат уонна академическай ырыаҕа саха оҕотун культураҕа сайдыытын историятыгар аан маҥнайгынан Гран-При буолары ситиспиппитинэн киэн тутта саныыбын. Олоҕум биир умнуллубат кэминэн — Эйфелева башняҕа үөhээ туран Париж куораты көрөр чиэскэ тиксээһин буолар.
2012 сыллаахха V «Азия оҕолоро» омуктар икки ардыларынааҕы спорт оонньууларын гимнын Кэнчээрилэр толорбуппутунан киэн туттабын.
Миэхэ «Кэнчээри» ансаамбылым духовнай сайдыыны, киhи быhыытынан үүнэргэ сайдарга улахан суолталаах этэ. Күндү ансаамбылбын 50 сыллаах юбилейынан эҕэрдэлиибин! Сайдыыны, өссө да үрдүк ситиhиилэри, Василий Степановичка кытаанах доруобуйаны баҕарабын, махтал истин тылларын аныыбын.
Виктория Копырина-Алексеева
Ансамбыл 2007 сыллаах выпускнига,
СВФУ Институт психологии преподавателя
Олунньу, 2023 сыл.