«Кэнчээри» оҕо норуодунай ансаамбыла 40-тан тахса сыл элбэх оҕону ырыаҕа, үҥкүүгэ уһуйда, музыка кэрэ эйгэтигэр сыһыарда. «Кэнчээри» выпускникгара култуура эйгэтигэр ситиһиилээхтик үлэлииллэр, республикаҕа биллэр ырыаһыттарынан, үҥкүүһүттэринэн буоллулар.
Саныыр, ахтар, таптыыр «Кэнчээри» ансаамбылбын кытта мин дьоллоох оҕо сааһым үтүө өйдөбүллэрэ сибээстээхтэр. Мин 4-с кылаастан ырыа алыптаах дорҕоонугар уйдаран, музыкаҕа, ырыаҕа умсулҕаным саҕаламмыта. «Кэнчээригэ» сылдьан, дойду араас муннуктарынан тэлэһийэн, үгүс омук оҕолорун кытта билсэн, билиим-көрүүм кэҥээбитэ, дириҥээбитэ, сырдыкка дьулуһуум күүһүрбүтэ. Убаастабыллаах салайааччыбыт Василий Степанович Парников хас биирдии оҕотугар болҕомтолоохтук сыһыаннаһан, талааммытыгар таба тайанан, дьоҕурбутун салгыы сайыннарарга толору кыаҕы биэрбитэ. Кини миигин саха норуодунай ырыаларын ордук табыллан толорорбун өтө көрөн, ансаамбыл солисткатын быһыытынан сайдарбар көмөлөспүтэ. Биһиги элбэх куонкурустарга кыттарбыт, лауреат, дипломант аатын ыларбыт. Саамай чаҕылхай өйдөбүлү 1987 сыллаахха ыытыллыбыт республикатааҕы солистар куонкурустара хаалларбыта. Мин манна ситиһиилээхтик ыллаан, I степеннээх дипломунан наҕараадаламмытым. 1988 сыллаахха II Бүтүн Сойуустааҕы норуот айымньытын фестивалыгар «Пионерская правда» хаһыат дипломунан, Читаҕа ыытыллыбыт III Бүтүн Сойуустааҕы норуот айымньытын фестивалыгар III степеннээх дипломунан бэлиэтэммитим, 1989 сыллаахха Амурскай уобаласка Саха сирин култууратын уонна искусствотын күннэригэр ситиһиилээхтик кыттыбыппыт.
1990 сыллаахха төрөөбүт оройуоммут Уус Алдан 60 сылын туолар үбүлүөйүгэр анаммыт уус-уран самодеятельноһы көрүүгэ кыттан, мин уонна Лена Варламова I степеннээх дипломунан наҕараадаламмыппыт. Ити сыл В.И. Ленин аатынан оҕо фондатын амарах дууһаланыы марафонугар кыттан Махтал суругу ылбыппыт. Биһиги ситиһиилэрбит — салайааччыбыт, бииргэ дьарыктанар оҕолорбут ситиһиилэрэ. Мин «Кэнчээригэ» сылдьыбыт кэмнэрбин махтанан туран саныыбын. Идэбин таларбар, дьоҕурбун арыйарбар ансаамбылым улахан быһаарар оруоллаах этэ. Биһиги ансаамбылга аҥаардас ырыаҕа, музыкаҕа эрэ үөрэммэтэхпит, киһи быһыытынан сайдарбытыгар, өй-санаа, сиэр-майгы өттүнэн үүнэрбитигэр көмөлөспүтэ.
Ытыктабыллаах учууталбын Василий Степанович Парникову үбүлүөйдээх бэлиэ сылынан итиитик-истиҥник эҕэрдэлиибин. Өссө да элбэх сылларга оҕолору искусство кэрэ эйгэтигэр угуйа, уһуйа тураргар баҕарабын! Учууталбар сүһүөхтээх бэйэм сүгүрүйэн, хоолдьуктаах бэйэм хоҥкуйан туран, барҕа махталбын тиэрдэбин. Эн ииппит оҕолоруҥ республика араас муннуктарыгар ситиһиилээхтик үлэлии сылдьалларыттан үөрэбин. Музыкальнай искусство араас көрүҥнэрин баһылаан, кэрэҕэ иитэр, үтүөнү үксэтэр дьон буолан, үүнэ-сайда турдуннар.
Варвара Аманатова, СР үтүөлээх артыыһа, Байаҕантай, Мүрү нэһилиэгин бочуоттаах гражданина,
Эстрада государственнай театрын артыыһа
2015 сыл.