Биһиги дьиэ кэргэнтэн «Кэнчээри» кэрэ эйгэтигэр түөрт эдьиийдии-балыс: бастаан мин, балтыларым Валя, Таня үнкүү салаатыгар уонна кыра балтыбыт Марианна хорга сылдьыбыта. Аны ансаамбылга билигин оҕолорбут дьарыктаналлар.
«Кэнчээригэ» сылдьыбыт сылларбын санаатахха, үгүс араас таһымнаах кэнсиэрдэр, сайыҥҥы лааҕырга сылдьыы, гастроллуу барыы, Туниска норуоттар икки ардыларынааҕы фестивальга кыттыы, Владивосток куоракка баар «Океан» оҕо лааҕырыгар республика араас ансаамбылларын кытта сынньаныы, үгүс доҕор-атас, араас күлүүлээх-көрүдьүөс түгэннэр өйбөр кэлэллэр.
Биһиги оруобуна 90-с сылларга түбэһэммит, ол кэмнэргэ олох- дьаһах да ыараан, үҥкүүбүт учуутала да, итиэннэ анал дьарыктанар дьиэбит да суох этэ. Ону, хата, олох даҕаны туох эрэ кыһалҕа курдук санаабат этибит. Бастаан киирэрбэр үҥкүүһүттэр старосталара Уля Ноговицына оҕолору түмэн дьарыктыыр этэ. Онтон староста дуоһунаһа миэхэ тиксэн, аны икки сыл үҥкүүһүттэри мин дьарыктаабытым. Василий Степанович уопуттаах педагог быһыытынан улахан киһиэхэ курдук сыһыаннаһан, сыал-сорук туруоран, тустаах үлэм, эбээһинэһим курдук сыһыаннаһар этим. Үҥкүүлүөн баҕалаах кыргыттар-уолаттар түмсэммит, бэйэ-бэйэбит тылбытын истиһэн, оскуола аактабай саалатын уонна культура дьиэтин икки ардыгар иллээх баҕайытык сылдьыбыппыт. Араас күннээҕи тэрээһин боппуруоһун быһаарсыы, бэрээдэкпитин көрүнүү, көстүүммүтүн отчуоттааһын барыта бэйэбитигэр сүктэриллэрэ. Бу барыта бэйэбитин бэйэбит сатаан салайына үөрэнэрбитигэр төһүү буолбута.
Люция Семеновна, анал үөрэхтээх эдэр специалист, үлэлээбит сылын наһаа үчүгэйдик саныыбын: олус бэриниилээхтик дьарыктаммыппыт, сороҕор күҥҥэ иккитэ да дьарык буолар этэ.
Василий Степановичка олоҕун анаан бу наһаа үчүгэй ырыа уонна үҥкүү ансаамбылын тэрийэн, улууспут, республикабыт элбэх оҕотун кэрэ эйгэтигэр угуйан, оҕо сааспытыгар умнуллубат кэрэ түгэннэри, дьоллоох кэмнэри бэлэхтээбитигэр ис сүрэхпиттэн биһиги дьиэ кэргэн аатыттан дириҥ махталбытын тиэрдэбит, кытаанах доруо- буйаны, өссө да үрдүк ситиһиилэри баҕарабыт!
Паша Аринкина (Мигалкина),
Госстатистика федеральнай сулууспатын СР территориальнай салаатын кылаабынай специалиһа-экспер
2015 сыл