«Кэнчээри» ансаамбыл хоругар мин бэйэм 4 сыл дьарыктаммытым. Кылааспыт салайааччыта, тапталлаах учууталбыт Татьяна Павловна, кылааспыт оҕолорун күүhүнэн кэриэтэ оскуола хоругар сырытыннарара. Оччолорго, оҕолор буолан, оонньуу, мэниктии бараары, элбэхтэ күрүү сатыыр этибит. Василий Степанович уруоктар кэннэ баянын сүкпүтүнэн 1 этээскэ, кирилиэс аттыгар манаан турар буолааччы.
Ол курдук, «Кэнчээри» ансаамбыл састаабыгар киирэн, бастакы кыттыбыт улахан тэрээhимминэн буолар 2003 с. Нерюнгри куоратыгар ыытыллыбыт Олонхо ыhыаҕа. Сайыҥҥы куйаас итиигэ автобуhунан уонна аан бастакыбын поеhынан тимир суолунан айаннаабытым.
Кэнчээри иитиллээччитэ буолан саамай киэн тутта саныыр түгэмминэн 2004 с. Азия оҕолоро III-с Международнай спортивнай оонньууга гимн толорбуппут буолар. Василий Степанович 40-чэ оҕону салайан 20 — чэ хонук түүннэри-күнүстэри, сылайбакка илдьэ сылдьыбытыттан сөҕөбүн, махтайабын.
Кэлин, үлэлии сылдьан, 2012 сыллаахха тас дойдуга Кытайга Международнай фестивалга кыттыыны ылбытым.
Билигин, аны 10 сыл ааспытын кэннэ, «Кэнчээри» иитиллээччитинэн буолар бэйэм оҕом – Вика Егорова. Бастакы кылааска үөрэнэ киириэҕиттэн, уоллуун кыыстыын бука бары кылааhынан ырыа, үҥкүү, фольклор уонна тыыннаах муусука эйгэтигэр «Кэнчээригэ» уhуйуллан барбыттара. Онно элбэх сыраны уурбут, күүстээх үлэни үлэлэспит, бириэмэни анаабыт, үөрэппит, такайбыт маҥнайгы учууталбыт, оҕолорго Ийэ кэриэтэ киhибит, Екатерина Степановна Парникова буолар. Оҕо, кыра эрдэҕиттэн, бары өттүнэн сайдарыгар – өй-санаа, эт-хаан, культура, дириҥ билии иҥэринэригэр ырыа, үҥкүү уонна төрөөбүт төрүт фольклорбут олук буоларын эрдэ билэн, үөрэтэн, чинчийэн туспа бырагыраама оҥорон үлэлэспиттэрэ номнуо 50 сыл буолла.
Ол курдук, оҕолор бүтүн кылааhынан оскуола иhинэн, улуустааҕы, өрөспүүбүлүкэҕэ уонна Дойду икки ардыгар ыытыллар араас таhымнаах күрэхтэр, фестиваллар, олимпиадалар кыттыылаахтара, лауреат, Гран-При хаhаайыттара, хас да төгүллээх кыайыылаахтара буолаллар.
— «Тыын» II улуустааҕы тыыннаах доҕуhуол түhүлгэтэ
— Республикатааҕы патриотическай «Главная песня о Родине» ырыа конкурса
— Республикатааҕы сайыҥҥы «Мое лучшее лето!» айыы фестивала
— Бриллиантовые нотки
— I Международнай эдэр толорооччулар аhаҕас «Розовая чайка» күрэх
— III Международнай «Музыка для всех» бырайыак конгреhа, о.д.а.
Оҕом кылааhыттан ВИА-ҕа 6 кыыhы талан Василий Июльевич Готовцев уонна Иннокентий Сивцев синтезаторга, бас, соло гитараҕа, ударнай инструменнарга оонньуурга үөрэппиттэрэ.
Оскуолабыт ремонун кэмигэр кылааспыт оҕолоро «Кэнчээри» эстетическай киин дьиэтигэр үөрэммиттэрэ. Мин бэйэм, ийэ быhыытынан, ол үөрэммит кэмнэрин саамай чаҕылхайынан сыаналыыбын. Оҕолор бука бары туора туран хаалбакка, күргүөмүнэн туох баар тэрээhиҥҥэ активнай кыттыыны ылбыттара, кыайбыттара-хоппуттара. Тоҕо диэтэр кинилэргэ усулуобуйалара баара, үрдүттэн олорон эрэн дьарыктаммыттара.
Быйыл «Кэнчээрибит» дьиэтэ өрөмүөннэнэн сырдык, ыраас хосторго өссө да элбэх иитиллээччи кэрэҕэ уһуйуллуо турдаҕа. Үрдүктэн үрдүк ситиhиилэр өссө да кэлэ турдуннар диэн «Кэнчээри» ансаамбыл төрүттээччитин, салайааччытын, убаастыыр учууталбытын Василий Степановиhы, Екатерина Степановнаны, Ульяна Петровнаны уонна туох баар үлэhиттэри, араас көлүөнэ выпускниктарын ис-сүрэхпиттэн эҕэрдэлиибин, кулун тутарга буолаары турар улахан үбүлүөйдээх тэрээhиҥҥэ кыттыыны ыларгытыгар ыҥырабын.
Егорова Валерия
«Кэнчээри» ансаамбыл 2005 с. Выпускнига,
Уус-Алдан улууhун администрациятын экономика управлениетын специалиhа.
Балаҕан ыйа, 2022 сыл.