Музыкальнай искусство араас көрүҥнэрин ортотугар хоровой искусство биир боччумнаах миэстэни ылар. Кини маассаны түмэр, холбуур, дьон чувствотын, өйүн санаатын күүһүрдэр , кэрэҕэ иитэр, киһи эстетическэй ирдэбилин хаҥатар дьикти дьоҕурдаах уонна кыахтаах көрүҥ.
Билигин республикаҕа ситиһиилээхтик ыллыы-туойа, үлэлии турар оҕо икки хоровой коллектива баар. Нерюнгри куоракка нуучча оскуолатыгар соҕурууттан кэлбит анал үөрэхтээх, уоппуттаах, сүдү сатабыллаах, талааннаах Петр Воронов 1986 с.тэрийбит “Соловушка” диэн дойду иһигэр, таһыгар да киэҥник биллибит үрдүк толорор техникалаах, уустук киэҥ репертуардаах хоровой-музыкальнай оскуола баар.
Иккис , саха оҕотун коллектива. Төрүттээбит киһинэн музыка да вокал да оскуолатын барбатах буолан баран, аҥардас айылҕаттан айдарыылаах талаанынан таба таайан, оҕолор куоластарын наһаа үчүгэйдик таба туруоран сайыннарар, ыллыыр диапазоннарын кэҥэтэр дьоҕурдаах , республика иһигэр, таһыгар да киэҥник биллибит, атын араас дойдуларга ыллаабыт, иһиллибит Уус-Алдан оройуонун киинигэр Мүрү 8-кылаастаах оскуолатыгар 1972 с.тэриллибит Кэнчээри диэн ансамбль салайааччыта, идэтинэн история учуутала Василий Степанович Парников буолар. Василий Степанович , нууччалыы эттэххэ, дьиҥнээх самородок-хормейстер. Үөрэтэр оҕолоро академическай (классическай), народной фольклорнай-этническэй да манеранан сатабыллаахтык ыллыыр кыахтаахтар. Хомойуох иһин оҕолору кытта сатабыллаахтык үлэлиир салайааччы билиҥҥитэ сахалартан кини соҕотох специалист диэтэххэ бука олус омуна суох буолуо дии саныыбын. “Кэнчээри” ансамбль репертуара киэҥ-норуот айымньытыттан классическайга тиийэ.
Биллэн турар, Василий Степанович бу үлэтигэр историк учуутал үрдүк үөрэҕин бүтэрбитэ, Найахы аатырбыт хоругар өр сыл ыллаабыт, истибит уопута уонна ис сүрэҕиттэн баҕата, таптала, дьүккүөрдээх үлэтэ көмөлөспүтэ чахчы.
Ытыктабыллаах Василий Степановичка, хоровой ырыа энтузиаһыгар ис сүрэхпиттэн баҕарабын кытаанах доруобуйаны уонна өссө да үлэлии, иитэ, айа сылдьарыгар!
РСФРС үтүөлээх, СР народнай артыыһа Ф.А.Баишева.
2012 сыл.