Ойор күннээх оҕо сааһым хаартыскалара! Кинилэри хас көрдөҕүм ахсын, чыпчылыйыах бэтэрээ өттүгэр, элэстэнэ охсубут олоҕум көмүс түгэннэрэ харахпар субу баардыы «мичээрдээбитинэн» эймэһийэ ааһаллар. Оччоҕуна мин, бэйэм да билбэппинэн, дьикти баҕайытык эргиллэн хаалабын «Кэнчээритээҕи» сылларбар. Олус да күндүтүк саныыбын, ансаамбылга сылдьыбыт кэрэ кэмнэрбин, үтүөкэн салайааччыбын Василий Степанович Парникову, муҥура суох махтал истиҥ тылларын этиэхпин баҕарабын — ытыктыыр учууталбар Василий Степановичка.
Ол саҕана саха оҕолоро ыраах сиргэ айаннаан, тиийэн араас фестивалларга, куонкурустарга кыттан, ситиһиилэнэн, кыайан кэлэрбит дьоллоох да түгэннэр этэ, оҕо сааһым биир умнуллубат кэрэ кэрдиис ураты кэмнэрэ. Мин иннибэр сытар хаартыскалар ону барытын кэпсииллэр, кэрэһилииллэр: Ташкент, Самарканд, Бухара, Пермь, дойду тэбэр сүрэҕэр Москваҕа Киин телевидениеҕэ уһуллуубут, Бүтүн Россиятааҕы «Артек» пионерскай лааҕырга сынньанан кэлиибит… Онно буолбута дии, араас дойдулартан сылдьар нуучча, омук оҕо аймаҕы кытта ыкса билсиһэн, доҕордуу кутаатын оттубут кэрэ кэмнэрбит, манна этэ дии, биһиги саха оҕолоруттан хор искусствотын курдук уустук көрүҥү аан маҥнайгынан Россияҕа таһаарбыт долгутуулаах түгэммит!
«Сыл — хонук» дииллэрэ чахчы эбит. Саха сиригэр, буолаары буолан, тыа сирин кыра Мүрү аҕыс кылаастаах оскуолатыгар, саҥа тэриллибит «Кэнчээрибитигэр» уҕараабат болҕомто уурулларыгар, сөҕүү-махтайыы күөдьүйэригэр, чэлгийэ сайдыы саҥа саҕахтара арылларыгар биһиги салайааччыбыт Василий Степанович Парников сүдү күүһүн-уоҕун уурбута.
Ол саҕана бастаан хор бөлөҕө, онтон ансаамбыл буолан аат толкуйдааһына, үҥкүүһүттэр бөлөхтөрө тэриллиитэ — бу барыта мин хараҕым далыгар буолбута.
Ансаамбылбыт күн бүгүн Бүтүн Сойуус, Россия, бэл, аан дойду үрдүнэн: «Саха сирин ылбаҕай ырыаһыт кэнчээрилэрэ», — диэн дуораччы дэтэригэр суолу тэлбит, ааны аспыт ол бэлиэ кэрдиис кэми арай саһарбыт хаартыскаларым барахсаттар кэрэһилиир курдуктар. Ону сэргэ, тоҕо-хоро кэпсиир аналлаахтар: «Кэнчээрибитин» бэркэ диэн хайҕаабыт, үгүскэ кынаттаабыт «Звезда», «Вечерняя Пермь», «Пионерская правда», «Бэлэм буол», «Ленинскэй тэрийээччи» хаһыаттар, «Музыкальная жизнь» сурунаал үтүмэн үгүс суруналыыстарын суруйууларын кырыйан ууруммут саһарбыт альбомум.
Бу барыта мин Саха Хомсомуолун бириэмийэтин лауреата «Кэнчээри» оҕо норуодунай ансаамбылыгар дьарыктаммыт өйтөн-сүрэхтэн хаһан да уостубат, умнуллубат кэрэ кэмнэрим хаартыскалара.
Манна бастакы олук ууруллубута, биһиги бэйэбитин салайаныыбыт, олоххо көрүүбүт, ыраах сиргэ тиийэн, бэйэ-бэйэбитин харааннаһыыбыт. Манна барытыгар биһиги салайааччыбыт Василий Степанович Парников үтүөтэ элбэх.
Мин мэлдьитин киэн туттуом ансаамбыл маҥнайгы иитиллээччилэриттэн биирдэстэрэ буоларбынан, Василий Степанович курдук бары өттүнэн дэгиттэр уһулуччу Учууталга үөрэммиппинэн!
Елена Федосеева-Кривошапкина,
СР социальнай көмүскэлгэ үтүөлээх үлэһитэ, РФ, СР социальнай сулууспаҕа туйгуна
2015 с