Аҕам ырыаһыт, уопсайынан, биһиги дьиэ-кэргэн култуураҕа сыстаҕас буолан, мин эмиэ ыллыыр, үҥкүүлүүр этим. Онон, 6 кылааска, 2004 сыл сааһыгар «Кэнчээри» ансаамбыл үһүс куолаһыгар киирбитим.
Ол сайыммар тута «Азия оҕолоро» норуоттар икки ардыларынааҕы спортивнай оонньуулар гимнэрин толорсо барар буолбутум. Онно оҕо санаабар күн-түүн бэлэмнэнэрбитин олус сөбүлээбитим. Үс-түөрт куолаһынан арахсан, дьикти, кэрэ мелодия тахсарыттан, уопсайынан, ыллыырбыттан наһаа да дуоһуйууну ылар этим. Бу кэмҥэ мин Бороҕоннооҕу оҕо музыкальнай оскуолатыгар норуодунай инструмеҥҥа үөрэнэ сылдьыбыт буоламмын, миэхэ музыка теориятыгар — сольфеджиоҕа чэпчэки этэ. Кэнники устудьуоннуу сылдьан, Василий Степанович хайдах итинник үрдүк таһымҥа үөрэтэрий диэн санаа үөскээбитэ. Кыра сылдьан ол туһунан толкуйдаабаккын даҕаны.
«Кэнчээригэ» киирбит күммүттэн бүтэриэхпэр диэри Василий Степановичка биирдэ да кыыһырбыппын, хомойбуппун өйдөөбөппүн. Дьиҥэ, биһигини кини үөрэтэрэ-такайара элбэх буоллаҕа дии. Ону биһиги барытын ылынан, иҥэринэн иһэр этибит. Миэхэ «Кэнчээри» ансаамбыл музыка эрэ өттүнэн буолбакка, духуобунай сайдыыны, киһи быһыытынан силигийэрбэр улахан суолталаах этэ. Василий Степанович кэлэктиип тыыныгар, аҕа саастаах дьоҥҥо убаастабыл, доҕордоһуу, төрөөбүт дойдуга таптал, о.д.а сүрүн өйдөбүллэри биһиги сүрэхпитигэр куруук иҥэрэ, үөрэтэ сылдьара. Ол да иһин, биһиги ансаамбылга куруук иллээх-эйэлээх, бэйэ-бэйэҕэ көмөлөсүһэ сылдьарбыт. Василий Степанович распевка иннинэ куруук олоххо буола турар быһыыны-майгыны, политикаттан, историяттан быһа тардан кэпсиирэ, бэйэтин санаатын этэрэ. Биһиги куруук интэриэһиргээн кэтэһэр этибит. Кэнники улахан кылаастарга тахсыбыппыт кэннэ өссө интэриэһинэй буолбута: бэйэҥ санааҕын этинэҥҥин, дьиҥнээх дискуссиялар тахсаллара.
Мин бастаан оскуолам учууталын этиитинэн «Юность Севера» хаһыакка кыра иһитиннэрии суруйбутум. Ону көрөн, Василий Степанович букатыннаахтык ылсан, миигин кыралаан суруналыыстыкаҕа сыһыаран барбыта. «Кэнчээри» олоҕун, тэрээһиннэрин улуустааҕы уонна «Кэскил», «Юность Севера» хаһыаттарга суруйарым. Билигин «Саха сирэ» хаһыат кэрэспэдьиэнниибин.
Чаҕылхай өйдөбүл Саха сирин күннэрэ дойду тэбэр сүрэҕэр Москваҕа ыытыллыбыт тэрээһиниттэн хаалбыт. Онно саха оҕолоруттан аан бастакынан таҥараҕа литургияны Быыһааччы Христос храмыгар толорбуппут эпохальнай түгэн этэ. Онно бастыҥнартан бастыҥнар талыллан барбыт буоламмыт, ханнык баҕар уустук ырыаны а капелла (музыката суох) ыллыыр кыахтаах буолбуппут. «Соловушка» образцовай хортан олох хаалсыбат этибит.
Элбэх сири кэрийэммит, атын оҕолортон быдан сайдыылаах курдук буоларбыт. Василий Степанович «оҕо дэгиттэр сайдыылаах буолуон сөп» диэн концепциятыгар олоҕураммыт, барытын сатыыр буолбуппут. Кэнники олохпутугар көмөлөстөҕө аҕай дии. Кэнники «Кэнчээри» оҕо норуодунай ансаамбыл старостата буола сылдьыбыппынан киэн туттабын.
Тапталлаах ансаамбылбар — сайдыыны, Василий Степановичка — кытаанах доруобуйаны!
Виктория Федотова,
«Кэнчээри» 2009 сыллаах выпускнига, «Саха сирэ» правительственнай хаһыат корреспондена
2015 сыл