Мүрү аҕыс кылаастаах оскуолатын уһун көрүдүөрүн түгэҕэр иһиллэр баян тыаһа, араас дорҕооннору таһааран, «распевкаланыы» иһиллэр… Оччолорго мин, 7 саастаах кыысчаан, ис-испиттэн ыллыахпын, үҥкүүлүөхпүн баҕарар буолан, «Кэнчээрилэр» дьарыктарын аан бастаан сэргии истибитим. Хата кыра кылаастары эмиэ ыллатан көрөн, ыллыах баҕалаахтары туспа дьарыктаан барбыта.
Учууталбыт Василий Степанович Парников миэхэ «Выглянуло солнышко» диэн ырыаны ыллатан көрбүтэ уонна өссө билэр «Күн бытархайа» диэн ырыабын ыллаан эйээрбитим. Онон «Кэнчээрилиин» алтыһар күннээх кэмнэрим 1987 сылтан саҕаламмыттара. Кэлин ансаамбылга Мүрү 1 №-дээх оскуолатыгар дьарыктанар буолбуппутугар, бөһүөлэк биир түгэҕиттэн уһуннук-киэҥник хааман, син балачча ыраах тиийэр буолбуппут.
Билигин олорон санаан, ырытан көрдөххө, биһиги уһуйааччыбыт, ытыктыыр учууталбыт, Василий Степанович бары өттүттэн дэгиттэр учуутал эбит. Кини аҥаардас ырыаҕа, сыанаҕа туттууга, саҥарыыга- иҥэриигэ эрэ буолбакка, оҕо бэйэни бэйэтэ салайыныытыгар, ис сиэрдээх, кэрэ эйгэтигэр тардыһыылаах буоларыгар, бириэмэтин аттаран таба туһаныытыгар улахан да суолталаах иитиини биэрбит эбит.
Биһиги дьарыктаныыларбыт, бастатан туран, оруобуна этиллибит чааһыгар саҕаланар этэ, онон «пунктуальнай» буоларга бастакы уһуйууну ансаамбылга ааспыппыт. Дьарык саҕаланыытыгар бастаан улуу классиктар музыкаларын пластинкаттан истэрбит. Моцарт, Бах, Бетховен айымньыларын тус бэйэм бастаан «Кэнчээригэ» истибитим. Оччолорго итинник араас улуу музыка ыал аайы суох этэ… Кэлин дьарык иннинэ аҕыйах мүнүүтэ политическай сонуннары истэр буолбуппут. Василий Степанович бэйэтэ история учуутала буолан, оччотооҕуга дойдуга буола турар политическай хамсааһыннары, Саха сиригэр туох сонун баарын, сороҕор ансаамбыл урукку выпусникгарын туһунан сырдатара. Онон тыа оскуолатын оҕолоро «Кэнчээригэ» сылдьан, бары өттүнэн сайдыылаах, билиигэ-көрүүгэ тардыһыылаах, үөрэхпитигэр кыһамньылаах, ыллыыр-үҥкүүлүүр, хомустуур кыахтаах буола улааппыппыт.
Ансаамбылы кытары мин аан бастаан атын нэһилиэктэргэ, Дьокуускайга, республика, Россия тас өттүгэр тахсан кэнсиэрдиир үөрүүнү билбитим. Бастакы уһун айаным Бүтүн Россиятааҕы «Океан» лааҕырга ыйы быһа сылдьыыбыт буолбута. Аан бастаан муора кытылынан хаамыы, үгүс элбэх доҕоттору кытары билсии, бэйэҕин бэйэҥ көрүнэн төрөппүтэ суох дьаһанан сылдьыы миэхэ 5 кылаастан саҕаламмыта. Василий Степанович хайа баҕарар гастроль кэмигэр кыралары улахан оҕолорго сыһыарааччы. Ол улахан эдьиийдэрбит биһигини көрөр-истэр, уруокпутун хонтуруоллуур этилэр. Кэлин бэйэбит улаатан, кыралары көрөр-истэр эппиэтинэстэммиппит. Маннык иитии билигин санаатахха, эппиэтинэстээх, бэйэ-бэйэҕэ көмөлөсүһэр, атын киһи иннигэр бэйэҥ эппиэттиир үөрүйэҕи биэрбит эбит.
Ханна да сырыттарбыт, бары үллэстэн үөрэнэр учебниктарбытын, хаһаайыстыбаннай малбытын илдьэ сылдьааччыбыт. Булгуччу уруок ааҕар, сынньанар бириэмэ бэриллэрэ, онтон киэһэ аайы күн хайдах ааспытын ырытар мунньах буолара. Сэмэлэммит киһи «Итог дня» диэн суостаах мунньаҕы сэрэнэ күүтэрэ… Мунньахха хайҕаннахха улахан үөрүү буолара, оттон буруйдаах алҕаһын өйдөөн, билинэн, «көнө суолга» турунара. Маннык иитэр үлэни ыытар, мин санаабар, оччотооҕу сэбиэскэй былаас ыһыллыытын дьалҕааннаах кэмин этэҥҥэ аһарарга оҕолорго туохха да тэҥнэммэт тирэҕи биэрбитэ.
Ансаамбылы кытары Хотугу Африка Тунис Республикатыгар тиийэн, саха ырыатын-тойугун, үҥкүүтүн көрдөрөн, хаһан да санаан көрбөтөх кумах куйаар дойдуга сылдьан, астынан кэлбиппит. Ханна да сырыттарбыт, саха оҕото хас да куолаһынан, араас манеранан ыллыыр дьоҕурун, бары өттүнэн дэгиттэр талааннааҕын сөҕөөччүлэр. Учууталбыт оҕо классическай да, норуот да ырыатын дьүөрэлээн ыллыыр кыахтаах диэн этэр. «Кэнчээрилэр», кырдьык, ону итэҕэтэн кэллилэр. Тунис туһунан мин бастакы улахан соҕус суруйуубун «Кэскил» хаһыакка таһаартарбыппыт. Маныаха эмиэ бастакы суруйуу аанын учууталым Василий Степанович арыйбыта. Тунистан кэлэн иһэн, суруйуубутун сөмөлүөккэ олорон саҕалаабыппыт. Онон эдэр кэрэспэндьиэн быһыытынан суруналыыстыка салаатыгар сыстыым эмиэ «Кэнчээриттэн» кынаттаммыта.
«Кэнчээри» ансаамбыл, дэгиттэр учууталым Василий Степанович, мин тус бэйэм олохпор улахан суолталаахтар. Инники идэни талыныыга, дьон иннигэр кыбыстыбакка саҥарар-иҥэрэр сатабылы үөскэтиигэ, олоххо сөптөөх суолу булунан, салгыы сайдарга, тус олоххо көрүүгэ, дьону кытары сыһыаҥҥа эппиэтинэстээх, эрэллээх буоларга уһуйааччым — учууталым. Оҕо хайаан да итинник кэлэктиипкэ иитилиннэҕинэ, кэрэни кэрэхсиир, олоҕу сыаналыыр, билэр-көрөр эйгэтэ кэҥиир диэн санаалаахпын. «Кэнчээри» ансаамбылы Василий Степанович тэрийбэтэҕэ эбитэ буоллар, Уус Алдан улууһугар үгүс көлүөнэ ыччат элбэҕи да сүүйтэриэ эбит. «Кэнчээригэ» иитиллибит оҕолор бары да олоххо бэлэмнээх, киэҥ билиилээх, муударай өйдөөх, сыаналыыр, ырытар сатабыллаах дьон буола үүммүттэрэ чахчы.
Учууталбар Василий Степановичка туохха да тэҥнэммэт баай сатабылы, сөптөөх иитиини, уһуйууну, аҕалыы амарах сыһыаны биэрбитигэр ис сүрэхпиттэн барҕа махталбын тиэрдэбин!
Нюргуяна Феоктистова, 1987—1997 сс. «Кэнчээри» ансаамбыл солиската, старостата, ыытааччыта,
ГТРК«Саха» «Вести-Саха» биэрии ыытааччыта,
РФ Суруналыыстарын сойууһун чилиэнэ,
республикатааҕы «Леди СМИ» 1 күөн күрэс кыайыылааҕа 2015 сыл.