Мин «Кэнчээригэ» төрдүс кылаастан, Бороҕоҥҥо Кэптэниттэн көһөн кэлиэхпиттэн ылата дьарыктаммытым. Кэлин балтым Таня эмиэ сөбүлээн сылдьыбыта. Вокалист буолар киһиэхэ ансаамбылга ыллааһын улахан суолталаах. Ол быһыытынан «Кэнчээригэ» мин аан бастаан профессиональнайдык толорууга үөрэммитим. Онон вокальнай искусство киэҥ эйгэтигэр үктэнэрбэр «Кэнчээригэ» ылбыт оскуолам кэлиҥҥи олохпор, артыыс быһыытынан буһан-хатан тахсарбар, «Туймаада» государственнай ансаамбылга, радио хоругар ыллыырбар төһүү буолбуттара.
Оҕо сааспыттан тус-туспа куолаһынан арахсан ыллыыр сатабылым кэлин олус туһалаабыта. Толорор партияҕын өйгөр хатыыргар, эппиэтинэстээхтик сыһыаннаһаргар Василий Степанович чиҥник үөрэппитэ. Биһиги кыра сааспытыттан номнуо саха классик композитордарын уустук айымныларын үөрэтэрбит, холонорбут. Учууталбыт олус ирдэбиллээхтик сыһыаннаһара, табатык, ыраастык толорорбутун ситиһэрэ.
Артыыс олоҕо сүрүннээн айаны-сырыыны кытта ситимнээх. Бастакы гастролларым «Кэнчээригэ» сылдьыахпыттан саҕаламмыттара: олус да элбэхтик айанныырбыт, үгүс да концертарга кыттарбыт. Киин телевидениеҕэ, радиоҕа тиийэ уһуллуубут олохпут кэрэ-бэлиэ өйдөбүлэ буолбута. Саамай биир умнуллубат, чаҕылхай түгэммитинэн 1979 сыллаахха Москваҕа «Веселые нотки» биэриигэ кыттыыбыт буолбута. Мин ансаамбыл солистката буоламмын, «һээдьэ» ырыаны таһаарбытым олус долгутуулааҕа. Маннык таһымҥа биһиги саха оҕолоруттан аан бастакынан кыттыбыппыт. Алла Пугачеваны илэ бэйэтин уонна кыыһа Кристина Орбакайтены кытта биир сценаҕа алтыһаммыт, сүрдээҕин үөрбүппүт, дьолломмуппут.
Ытыктыыр Василий Степановичпыт биһиги олохпутугар, ырыанан профессиональнай таһымҥа тахсыыбытыгар, саҥа үрдэли дабайарбытыгар, артыыс буолар дьылҕабытыгар үтүө сабыдыалы хаалларбыта саарбаҕа суох. Ол да иһин, ханна да сырыттарбыт, төһө да күн-дьыл субуллан ааспытын иһин, оҕо сааспыт ырыалаах сырдык эйгэтэ биһиэхэ өрүү истиҥ, сылаас уонна күндү.
Анастасия Готовцева,
СР үтүөлээх артыыһа, «Этигэн хомус-2010» музыкальнай бириэмийэ «Сыл бастыҥ толорооччута»,
«Икки сулус-2013» теле-куонкурус кыайыылааҕа
2015 с.