Бу кэмнэргэ биһиги, «Кэнчээри» ансаамбыл бары иитиллээччилэрэ, өрө көтөҕүллэн туран олохпут биир саамай умнуллубат кэрэ түгэни бэлиэтии сылдьабыт. Ол биһиги саһарҕалаах оҕо сааспытыгар чаҕылхай, ыҥырар — угуйар сулуспут буолбут «Кэнчээрибит» үйэ аҥаардаах үбүлүөйэ кэлбитинэн!
Түгэнинэн туһанан, өр сылларга сүрэхпитигэр — быарбытыгар илдьэ сылдьыбыт бары махтал, таптал тылларбытын этиэхпитин баҕарабыт Учууталларбытыгар В. С. Парниковка, З. Г. Ксенофонтоваҕа, Е. С. Прокопьеваҕа. Күндү дьоммутугар сүһүөхтээх бэйэбит сүгүрүйэн туран, бары үчүгэйи, сырдыгы баҕарабыт.
«Кэнчээриттэн» кынат үүннэрэн, үгүспүт култуура, искусство эйгэтигэр үлэлии-хамныы сылдьабыт. Ол Учууталларбыт үлэлэрин түмүгэ! Бүгүн биһиги, хореограф идэтин талбыттар, үҥкүү кэрэ эйгэтигэр сиэтэн киллэрбит учууталларбыт тустарынан истиҥ-иһирэх тылларынан ахтыахпытын баҕарабыт… Зоя Гаврильевна Ксенофонтова, Елена Степановна Прокопьева иккиэн Дьокуускайдааҕы культурнай-сырдатар училище иһинэн аһыллыбыт үҥкүү салаатын бүтэрбиттэртэн биир бастакылара, сахаттан бастакы балерина А. В. Посельская үөрэнээччилэрэ. Зоя Гаврильевна — «Кэнчээри» бастакы хореограба. 1971 с. ЯРКПУ — ну бүтэрэн баран, Оройуоннааҕы култуура дьиэтигэр үҥкүү бөлөҕүн салайа сылдьан, «Кэнчээри» ансаамбыл салайааччыта Василий Степанович көрдөһүүтүн ылынан, ансаамбыл маҥнайгы хараҥаччыларын үҥкүүгэ уһуйбута. Онно кини РДК — ҕа үөрэтэ сылдьар оҕолоро тирэх буолбуттара. Араас таһымнаах кэнсиэрдэр, күрэхтэр, фестиваллар кыттыылаахтара буолан,»Кэнчээри» ансаамбыл үрдүк ситиһиилэргэ хардыытыгар Зоя Гаврильевна үҥкүүһүттэрэ төһүү күүс буолбуттара. Зоя Гаврильевна 1975 с. Дьокуускай куоракка көһөн баран оҕолору кытта айымньылаах үлэтин салҕаабыта. Ол курдук, Пионердар дыбарыастарыгар «Чэчир», » Сир симэҕэ» диэн ансаамбыллары тэрийэн, саха оҕолорун үҥкүүлэрин аар — сааргы аатырдыбыта, биһиги «Кэнчээрибит» курдук «народнай», «образцовай» коллективтар буолалларын ситиспитэ. Зоя Гаврильевна ССРС үөрэҕириитин туйгуна, Саха республикатын култууратын үтүөлээх үлэһитэ, Россия үөрэх систематын бочуоттаах үлэһитэ.
1975 сылтан ансаамбыл үҥкүүһүттэрин уһуйааччынан Елена Степановна Прокопьева буолбута. Эмиэ РДК — ҕа үлэлиирин таһынан, ансаамбыл үҥкүү бөлөҕүн салайбыта. 1980 сылтан «Кэнчээригэ» хореограф анал штата көрүллэн, Елена Степановна онтон ыла өр сылларга Василий Степанович уҥа илиитэ, эрэллээх көмөлөһөөччүтэ буолбута, ансаамбылбыт билиҥҥи улахан ааттарын сүгэригэр, оҕолор ырыаны, үҥкүүнү дьүөрэлээн, искусство кэрэ эйгэтигэр сайдалларыгар улахан кылааты киллэрсибитэ. Кини туруорбут үҥкүүлэрэ, композициялара билигин даҕаны «Кэнчээри» репертуарыттан тахсыбаттар, ансаамбыл үҥкүүһүттэрэ олус дуоһуйан, өрө көтөҕүллэн толороллор. Елена Степановна кэнники сылларга Дьокуускайга улаханнык биллэр «Айылгы» ансаамбылга хореографтаабыта, билигин тапталлаах ансаамбылбытыттан кынат үүннэрэн тахсыбыт үҥкүүһүттэрбиттиттэн тэриллибит «Алаас кыргыттара» ансаамбылга уһуйааччы быһыытынан үлэлии — хамныы сылдьар. Елена Степановна — Саха Комсомолун, А. В. Посельская аатынан бириэмийэлэр лауреаттара, ССРС култууратын туйгуна, Мүрү нэһилиэгин бочуоттаах олохтооҕо.
Хас биирдии киһиэхэ Учуутал аата — суола олус күндү. Сыл-хонук ааһан истэҕин аайы кинилэр биһиэхэ анаабыт сыралара, үтүө санааларынан инникибитин түстээбиттэрэ барыбытын холбуур, ситимниир, үрдүккэ кынаттыыр. Учууталларбыт эрэллэрин түһэн биэрбэккэ, олохпут суолунан эрэллээхтик хардыылыыбыт!
«Кэнчээри» ансаамбылтан иитиллэн тахсыбыт хореографтар.
Кулун тутар, 2023 сыл.