«Сыл-хонук…» диэн эттэххэ эрэ дөбөн, суруйдахха эрэ дэбигис курдук. Биһиги оскуола сааспыт Мүрү аҕыс кылаастаах оскуола, Кэнчээри диэн сүдү суолталаах тылы кытта ыкса ситимнээх.
Оҕо саас ахтылҕана, оҕо сааспыт салгына, сырдыгынан сыдьаайар кэрэһитэ буолаҕыт — Кэнчээри ансамбла бииргэ дьарыктаммыт, уһуйуллубут оҕолорбут.
50 сыл номнуо буола охсубут, эрбэспит-сэрбэспит, чоҕулуччу көрбүт кыргыттар-уолаттар ырыа куруһуогар сылдьыбыт кэмнэрбит. Күндүтүк саныыр салайааччыбыт, учууталбыт Василий Степанович Парников биһигини аан бастаан таба көрөн куруһуоктан саҕалаан сырытыннаран ансамбль тиийэ үүммүтэ. Биир үтүө күн Василий Степанович ансамбль буолабыт, аат толкуйдуубут диэн буолбута. Дьэ, онно элбэх ааттар ааттаммыттарыттан Кэнчээри диэҥҥэ тохтообуппут.
Бастакы 1972 сыл хараҥаччыларынан буолаллар: Федор Федосеев, Федор Стрекаловскай, Витя Ефимов, Зоя Гоголева, Рита Бочкарева, Зина Бурцева, Иза, Лена Григорьевалар, Света Бурцева, Айта Дорофеева. Ол саҕана үҥкүү да ырыа биирдэр этэ, кинилэри үҥкүүгэ уһуйбута Зоя Гаврильевна Протодьяконова. Иза, Лена Григорьевалар ырыаҕа да, үҥкүүгэ дьарыктаммыттара. Мындаабанан, Майаҕаһынан, Чараҥынан концердаан кэлэллэрэ.
Онтон салгыы бииртэн биир оҕолор сөбүлээн сылдьар ансамбллара буолбута; Рея Охлопкова, Октя Басыгысова, Наташа Бочкарева, Маша Ховрова, Маша Сергеева, Эльза Алексеева, Аня Стрекаловская, Оксана Атласова, Валя Самсонова у.д.а. Уолаттартан Сергей Константинов, Максим Пухов, Петя Местников, Вася Александров, Толя Курилкин. Сергей Константинов, Вася Александров, Эльза Алексеева, Маша Сергеева, Таня Белямова — ансамбль солистара, дуэтынан ырыаҕа Сергей, Максим, Маша Сергеева, Оксана Атласова олус үчүгэйдик табыллан ыллыыллара. Дэгиттэр талааннаах үҥкүүһүттэр Оксана Атласова, Валя Самсонова, Лена Винокурова, кэнники хореограф үөрэҕин бүтэрэн оҕолору үөрэппиттэрэ. Валя хореографтар түмсүүлэрин салайааччытынан сылдьыбыта.
Ансамблга дьиэ-кэргэнтэн хастыы оҕо дьарыктаналлара үгэскэ кубулуйбута, ол курдук Федор, Лена Федосеевтар, Рея, Аня Охлопковалар, Валя, Рита, Лиза, Оксана Самсоновалар, Маша, Лена Павловалар, Иза, Лена, Моника Григорьевалар, Валя, Лана Атласовалар, Алина Никифорова, Вася, Фая, Сардана Александровтар, Настя, Таня Готовцевалар, у.д.а.. 1980 сыллаахха бүтэрбит оҕолортон Аня Охлопкова, Маша Павлова, Рита Самсонова, Ира Сыроватская, Света Бочкарева, Таня Белямова, Наташа Протодьяконова, Наташа Кривошапкина утумнаахтык дьарыктаммыттара.
Биһиги саҕана оскуола оҕолорун икки ардыларыгар агитбригада күрэхтэһиитэ буолара. Республикаҕа, оройуоҥҥа аатырбыт Дүпсүн орто оскуолатын «Зорянка» агитбригада оҕолорун кытта күөн көрсөрбөт. Оскуолаҕа үөрэнэ сылдьан Кэнчээригэ сылдьарбыт үөрэхпитигэр олох мэһэйдээбэт этэ. Бары үчүгэйдик үөрэнэрбит, оҕолорбут успуордунан да дьарыкталлара, араас күрэхтэһиилэргэ да кытталлара. Ол курдук Таня Белямова кыһыл көмүс мэтээлинэн, Наташа Кривошапкина, Наташа Протодьяконова. Харааста саныыбын биһиги кэккэбитигэр суох буолбут бииргэ уһун кэмҥэ дьарыктаммыт кыргыттарбытын Наташа Протодьяконованы, Лена Винокурованы, Оксана, Лана Атласовалар, Света Ширяева. Ол гынан баран олох салҕанар, кинилэр биһиги өйдөбүлбүтүгэр куруук мичилийэ, үҥкүүлүү ыллыы сылдьар мөссүөннэрэ баар.
Куруутун өйдөөн-санаан ааһабыт ансаамблбыт тэриллэригэр олук уурбут оскуолабыт директордарын С.П.Трифонов, К.П.Андросов, Е.С.Слепцов, С.Д.Солдатова. Өйдүүбүт: Настя Готовцева, Алина Никифорова кыракый сылдьан Кэнчээригэ кэлбиттэрин, сценаҕа тахсан туохтан да толлубакка, кыбыстыбакка ыллыы туралларын. Таня Белямова нуучча кыыһа академическай куолаһынан сахалыы ыллаан көрөөччүлэри сөхтөрөрүн.
Барыбытын ситимнээбит, күндүтүк саныыр учууталбыт Василий Степанович Парников буолар. Кини биһигини аан бастаан таба көрөн, үйэлээх Кэрэ өйдөбүлүн иҥэрбитигэр, оҕо саапытыгар бүтүн Аан дойдуну уһаты-туора сыныйан уот харахпытыгар көрдөрбүтүгэр, олох оскуолатын бэлэхтээбитигэр күн бүгүҥҥэ диэри сүгүрүйэ уонна махтана саныыбыт.
Көлүөнэ-көлүөнэ тус-туһунан өйдөбүллээх буоларын киһи сааһа эбиллэн истэҕин ахсын дьэҥкэтик өйдүүр буолар эбит. Биһиги оҕо сааспыт, туох да диэбит иһин, сүрдээх дьикти уонна сырдык кэмҥэ ааспыта, үйэтитиигэ киирбитэ. Биһиги көлүөнэ оҕолоро Кэнчээри ансаамбыл маҥнайгы үнүгэстэрэ, этэргэ дылы силистэрэ-мутуктара буолан, оҕо хоровой искусствота аан дойдуга сураҕырар олук уурсубут дьоллоохпут. Манна дьарыктанан, ыллыырга, үҥкүүлүүргэ эрэ үөрэммэтэхпит, аан бастакынан бэйэни-бэйэ салайыныы олох оскуолатын барбыппыт. Ол иһин мантан иитиллэн тахсыбыт оҕолор республика хайа да муннуктарыгар тиийэн, ситиһиилээхтик үлэлии сылдьалларыттан киэн туттабыт. Биһиги кэккэбитигэр бааллар араас үлэ эйгэтин туйгуннара, үтүөлээх үлэһиттэр, улуус, нэһилиэк бочуоттаах олохтоохторо.
Үөһээ ахтыбытым курдук өскөтүн ансаамбыл бастакы хараҥаччылара нэһилиэктэри кэрийэ сылдьан концердаан саҕалаабыт буоллахтарына, кэнники уһуйуллан, иитиллэн Сэбиэскэй сойуус, республика араас муннугар, международнай фестивалларга, куонкурстарга кыттан, бүтүн Союзтааҕы «Артек» пионерскай лааҕырга ыллаан-туойан ааспыппыт. Өйдүүбүн «Артек» лааҕырга сылдьан хоһоон айыытыгар, хас биирдии бэйэбитигэр мэтээл биэрбиттэрин уонна лааҕыр олоҕор ахтыыбынайдык кыттыым иһин дипломнарынан наҕараадаламмыппын.
Ол саҕана Саха оҕолоро ыраах сиргэ айаннаан, тиийэн араас фестивалларга, куонкурустарга кыттан, ситиһиилэнэн, кыайан кэлэрбит, дьоллоох да түгэннэр этэ, оҕо сааһым умнуллубат кэрэ кэрдиис ураты кэмнэрэ: Ташкент, Самарканд, Бухара, Пермь, Бүтүн Россиятааҕы «Артек» лааҕыр. Онно буолбута дии, араас дойдулартан сылдьар, нуучча, омук оҕо аймаҕы кытта билсиһэн, доҕордоһуу кутаатын оттубут кэрэ кэмнэрбит, манна этэ дии, биһиги саха оҕолоруттан хор искусствотын курдук уустук көрүҥү аан маҥнайгынан Россияҕа таһаарбыт долгутуулаах түгэммит. Хас биирдии тиийбит сирбитигэр концердаан, араас экскурсияларга сылдьан кэлэрбит. Дьокуускай телевидениеттан саҕалаан Киин телевидениеҕа уһуллубут, биллиилээх ырыаһыттар, композитордар, култуура, искусство деятеллэрин үрдүк сыанабылларын ылыыбыт, билигин Саха сирин үйэлээх остуоруйатыгар киирбититтэн долгуйабыт, сэмэйдик киэн туттабыт.
Тапталлаах «Кэнчээрибитин» күн бүгүҥҥэ диэри салайа олорор Василий Степанович биһиги өйдөбүлбүтүгэр улахан буукубаттан суруллар Учуутал быһыытынан олохсуйа сылдьар. Кини ырыаҕа уһуйбут оҕолоро, биһиги харахпыт далыгар улааппыт, билигин да ыллыы сылдьалларыттан Саха республикатын үтүөлээх үлэһиттэринэн киэн туттабыт: Варя Аманатова, Толя Бурнашев, Лина Акимова, Настя Готовцева, үҥкүү эйгэтиттэн Айта Носова. Ураты лыҥкынас куоластаах Саргы Кириллова, Дуня Старостина, Настя Алексеева ханнык баҕарар куонкурстарга кыттыахтарын сөп дии санныыбыт.
Киэн тутта ааттыыбыт Зоя Гаврильевна кэнниттэн, үҥкүүнү салайбыт, араас постановканы туруорбут Елена Степановна Прокопьеваны. Елена Степановна сүрдээх холку майгылаах, сатаан үҥкүүлээбэт да оҕолору, чочуйан таһаарбыта сүрдээх. Айта Носова, Моника Григорьева балетнай оскуолаҕа уһуйулла барбыттара, элбэх оҕолор хореограф идэтин баһылаан, үҥкүү алыптаах эйгэтигэр Елена Степановна суолун-ииһин салҕаан, оҕолору үөрэпиттэрэ. Наһаа үөрэбит билигин да Елена Степанона Кэнчээриттэн тахсыбыт оҕолору «Алаас кыргыттара» үҥкүү түмсүүтүн салайа сылдьарыттан.
Ытыктабыллаах араас кэм выпускниктара, 50 сыл диэн история сыыппарата, бу сыыппара биһиги дьоллоох оҕо сааспытын кэрэһэлиир.
Бары биир киһи курдук оҕо сааспытын санаан үбүлүөйнэй тэрээһиннэргэ кыттыаххайын диэн ыҥырабын.
Күндү салайааччыбыт Василий Степанович үйэ аҥаара салайан кэлбит тапталлаах, кэрэҕэ уһуйбут, ырыа куруһуогуттан саҕалаабыт, билигин Российскай Федерация норуот айымньытын Үтүөлээх кэлэктиибэ буола үүммүтэ элбэҕи туоһулуур, Бу улахан үлэттэн тахсар сүдү Аат.
Бары выпускниктары, ытыктыыр салайааччыларбытын Василий Степанович, Зоя Гаврильевна, Елена Степановна үбүлүөйдээх үйэ аҥаарын кэрэһэлиир, Кэнчээри ансаамблбыт маанылаах күнүнэн эҕэрдэ буолуохтун,
Ахтыыны суруйда Елена Кривошапкина-Федосеева
Саха Республикатын нэһилиэнньэ социальнай көмүскэлигэр үтүөлээх үлэһитэ,
Российскай Федерация уонна Саха Республикатын социальнай сулуусбаҕа туйгуна, Мүрү нэһилиэгин бочуоттаах олохтооҕо.
Тохсунньу 27 күнэ 2023 сыл