Төрөппүттэрбит Людмила Лукинична, Владимир Семенович кэрэни, билиини-көрүүнү, сайдыыны олохторун тухары өрө туталлар. Арай биирдэ, арааһа, мин 4—5 саастаахпар буолуо, аҕам эбиэккэ үлэтиттэн кэлээт: «Киэһэ кэнсиэргэ барыахпыт, «Кэнчээрилэр» кэнсиэртэрэ», — диэтэ. Мин «Кэнчээри» диэн тугуй диэн, токкоолоһон бөҕө. Оччолорго биһиги Кэптэнигэ олорорбут. Киэһэм үүнэрин кэтэс да кэтэс. Кулуупка бардыбыт. Быыс аһылынна. Куобах түүтэ киэргэтиилээх сахалыы таҥастаах оҕолор сэлэлии турбуттар. Куоласка арахсан, ыллаан-туойан чугдааран бардылар, наһаа үчүгэйдик үҥкүүлүүллэр, хомуска оонньоон дьүрүһүтэллэр. Эчи хаарыаны, мин эмиэ итинник ыллыахпын, үҥкүүлүөхпүн баҕарабын. Алын кылаас оҕолоро эмиэ кытыннылар быһыылаах, ол иһин: «Ити оҕо хас саастааҕый, мин саҕа дуо?»— эҥин диэн, аҕабыттан токкоолоһо олорбутум. Мин оҕо сүрэхпэр «Кэнчээри» ансаамбыл итинник сүрэхтэммитэ.
Үрдүкү кылааска эрдэхпинэ, биһиги Бороҕоҥҥо көспүппүт. Дьэ, били кэнчээрилээх ырабар чугаһаабыт курдук буолан, Василий Степановиһы балтым Дианалыын анаан көрүстүбүт. Урут үҥкүүлээбит буолан, «Кэнчээригэ» үҥкүү бөлөҕөр сылдьыахпытын баҕарарбытын биллэрдибит. Биллэн турар, бастаан ыллатан көрбүтэ. Киһини кэрэхсэтэр, үөрдэр гына ыллаабатахпытын биллэр да, эһиги мөлтөххүт эҥин диэбэтэ. Арай: «Үҥкүүгэ педагогпут суох, ол иһин оҕолор бэйэлэрэ эрчиллэллэр. Эһиги сатаан үҥкүүлүүгүт. Аны ыллыыр дьоҕургутун уһугуннарыаххытын баҕарбаккыт дуо, хорга сылдьыҥ», — диэбитигэр, соһуйан эрэ хаалбыппыт. Маннык улахан, үчүгэй ансаамбылга уһулуччу дьоҕурдаах эрэ оҕолор сүүмэрдэнэн, талыллан киирэллэрэ буолуо дии саныыр этибит. Ону баара, манна быдан баһыйар өттө, ылланан хайҕамматахтар, биһирэммэтэхтэр кэлэн, сотору кэминэн ыллыыр буолан тахсаллар эбит. Хаһан да ыллаабатах оҕолору ыллатыахха, куоласка араарыахха диэтэххэ, хайдахтаах сыраны эрэйэр үлэний? Дьэ ити — биһиги учууталбыт сүрүн уратыта. Саха оҕото дьоҕурдаах, үс ньыманан ыллыыр кыахтаах диэн, 40-тан тахса сыл устата дакаастаан кэллэ. Биһиги улахан махталы кытта ансаамбылга дьарыктанар буолбуппутуттан олус диэн үөрбүппүт. Кэлэктиипкэ киирэн, бэйэбит да билбэппитинэн, бэрт соторунан партиялары ыллыыр, билэр буолбуппут.
Мин ансаамбылга балтараа сыл сылдьаат, оскуолабын бүтэрбитим. Устудьуоннуу киирэн баран, «Кэнчээрибин» олус ахтарым, куоракка киирдэхтэринэ, көрсө сатыырым, хаһыаттарга матырыйааллары бэлэмниирим, ардыгар, кэнсиэртэргэ үөрэ-көтө кыттарым.
Василий Степанович айымньылаах үлэтэ — туох да харгыһа, моһоло суох, остуол ньуурун курдук көнө буолбатах. Хас ситиһии, хас куонкурус, хас ыраах айаннар — биһиги учууталбытыгар үгүс үлэттэн, өй-сүрэх күүрүүтүттэн тиһиллэн тахсаллар. Василий Степанович идеятыгар, үлэтигэр олус бэриниилээх буолан, элбэҕи эрдээхтик тулуйар…
Үөрэхпин бүтэрэн, оскуола саастаах оҕолорго аналлаах «Бэлэм буол» — «Кэскил» хаһыакка үлэлиир буолбутум туһунан учууталбар эппиппэр: «Наһаа үчүгэй. «Кэскил» — иҥэ-дьана суох, ыраас, сырдык тыыннаах редакция. Мин «Кэскиллэри» «Бэлэм буол» эрдэхтэриттэн билэбин. Биһиги ансаамбылбыт туһунан биир бастакынан уонна сиһилии, наһаа үчүгэйдик «Бэлэм буол»-«Кэскил» баччааҥҥа диэри сырдатан кэллэ. Эдэр киһи, эн, итинник үтүө тыыннаах кэлэктиипкэ үлэлиириҥ ордук. Олус үөрдүм, кытаат», — диэбитэ.
Үлэһит буолан баран, ансаамбылы кытта Турцияҕа, Францияҕа суруналыыс, тылбаасчыт, салайааччы быһыытынан учууталым көрдөһүүтүн быһа гыммакка, арыаллаан барсыбытым. Дьэ, манна, эт мэйиибинэн, эппинэн-хааммынан «Кэнчээри» үлэтэ туохтан тутулларын, хайдахтаах түбүктэн тиһиллэн тахсарын дьэҥкэтик өйдөөбүтүм. 2007 сыллаахха Василий Степанович доруобуйатын туругунан Францияҕа кыайан барбатын эппитэ. Учууталым ыраах айаҥҥа барар кыаҕа суоҕуттан санаарҕаан, уйадыйан, хараастан да ылбыт түгэннээҕим. Францияҕа «Хрустальная Лира» куонкуруска Гран-при аатын сүкпүппүтүгэр, фольклор көрүҥүгэр бастаабыппытыгар, учууталбыт олус үөрбүтэ. Ити кыайыыга кыттыгастаахпынан мин эмиэ киэн туттабын уонна ансаамбылга сылдьыбыт, иитиллибит иэспин төлөөбүт курдук сананабын.
Былырыын Дьокуускайга Россия норуодунай артыыһа, Россия сүрүн дирижера, аан дойдуга бастыҥ оркестрынан аатырар Мариинскай тыйаатыр уус-уран салайааччыта Валерий Гергиев ыалдьыттаабыта. Хору сөргүтэр наадатын, туһатын туһунан Валерий Гергиев суруналыыстарга тоһоҕолоон кэпсээбитэ. Оттон биһиги Василий Степановичпыт хор, хор искусствотын туһа диэн, оскуола аайы хор баар буолуохтаах диэн сааһын тухары тыл эттэ, элбэх ыстатыйаны суруйда. Сөпкө да өтө көрбүт эбит дии саныыбын.
Ахтылҕан күүскэ куустаҕына, «Кэнчээри» диискэтин холбоон, үрдүк ноталары холкутук ыллыыр оҕолор лыҥкынас, ыраас куоластарын дьикти дорҕоонноругар курдаттыы абылатабын уонна оҕо сааһым бэрт чаҕылхай өйдөбүллэригэр, ыраларыгар көҥүллүк көтөн, төннөн, умсан ылабын. Ыралааҕым уонна «Кэнчээрилээҕим» үчүгэйин!
Жанна Леонтьева,
Норуоттар икки ардыларынааҕы «Саха-Азия оҕолоро» пуонда 2002 с. лауреата, суруналыыстар республикатааҕы «Сыл дебюта» бириэмийэлэрин 2004 с. лауреата,
«Барҕарыы» пуонда стипендиата, «Кэскил» хаһыат оскуола салаатын редактора, хоһоон кинигэлэрин ааптара
2015 сыл.