1990 сыллаахха Бороҕоҥҥо оҕо музыкальнай оскуолатыгар үлэлии кэлбиппэр, Василий Степанович аккомпаниаторынан үлэлэс диэн ансаамбылын репертуарын ноталарын туттаран кэбиспитэ. Дьэ, ол кэнниттэн сүрүн үлэм таһынан чугастык алтыһан, 2007 сыллаахха диэри үлэлээн кэллим. Ол курдук, ансаамбылы кытары бастакы сырыым 1991 сыллаахха Москваҕа Хотугу норуоттар күннэригэр этэ. Онтон эһиилигэр, 1992 сыллаахха Хотугу Африкаҕа, Туниска «Кэнчээри» ансаамбыл аан бастаан кыраныысса таһыгар сылдьыытынан киэн туттабын. Онно Россия посольствотыгар элбэх араас дойдулар посолларыгар сахабыт култууратын көрдөрөн, классическай ырыалары толорон, «Кэнчээрилэр» киэҥ сэҥээриини, үрдүк сыанабылы ылбыттара.
Ити сыл «Кэнчээри» ансаамбыл 20 сылын улууспутугар киэҥник бэлиэтээһин буолбута. Элбэх ыалдьыттар, кэлэктииптэр кыттыылаах киэҥ далааһыннаахтык, үөрүүлээхтик ыытыллыбыта.
Бу кэмнэргэ элбэх улуустааҕы, республикагааҕы аата-ахсаана суох куонкурустарга өрүү ситиһиилээхтик кыттан, оҕолор улуустарын аатын элбэхтэ ааттатан, Владивостокка «Океан» лааҕырга тиийэ сылдьыбыттара.
2003—2004 сылларга «Инникигэ хардыы» научнай-практическай конференция, «Азия оҕолоро» спортивнай оонньууларын гимнэрэ бигэргэнэн, ыллатыыларыгар Василий Степанович өйөбүлэ улахан. Ити ырыалар «Кэнчээри» ансаамбыл толоруутугар билиҥҥээҥҥэ диэри ылланан кэллилэр.
2007 сыллаахха Саха сирэ Россия састаабыгар киирбитэ 370 сылын бэлиэтиир үбүлүөйдээх дьаһалларын түмүктүүр тэрээһиҥҥэ Москваҕа республика Күннэрин култуурунай программатыгар ситиһиилээхтик кыттаннар, «Кэнчээри» Россия оҕо образцовай ансаамбыла ааты сүкпүттэрэ. Хормейстер-репетитор, «Тойон Мүрү» КК специалиһа Елена Охлопкова, хормейстер-репетитор Диана Леонтьева буоламмыт, бастаан Нерюнгрига «Соловушка» оҕо хоровой оскуолатын (сал. Н.А. Седельникова) иитиллээччилэрин кытта Христос Быыһааччы храмыгар Сибэтиитэл Иннокентий бырааһынньыгын сулууспатыгар анаан 20 оҕолоох тиийэн кыттыбыппыт. Бу Россия историятыгар аан бастаан литургияны сахалыы тылынан толоруу этэ. Москва уонна Бүтүн Россия Патриарха Алексий II улахан биһирэбилин, махтаныытын ылбыппыт.
Василий Степанович 1978 с. «Тойон Мүрү» улуустааҕы мелодистар түмсүүлэрин тэрийэн, таһаарыылаахтык үлэлэтэн, салайан кэллэ. Мелодистар ырыанньыктара, диискэлэрэ тахсыытыгар, айар киэһэлэрин тэрийиилэригэр мэлдьи куруутун күүс-көмө буолар.
Василий Степановиһы кытта үлэлээбит кэмнэрим — олоҕум кэрэ-бэлиэ умнуллубат түгэннэрэ. Кини култуура сайдыытыгар бэриниилээх, таһаарыылаах үлэтэ барыбытыгар холобур буолар.
Станислав Луковцев,
мелодист, «Дуолан» эр дьон ансаамбыл, «Умсулҕан» коллекционердар түмсүүлэрин салайааччыта
2015 с.