Оччолорго орто оскуола аҕыйах этэ. Мин Баатаҕай оскуолатын бүтэрэн баран, 1967—1969 үөрэх дьылларыгар Найахы орто оскуолатыгар үөрэммитим. Интернакка олорбутум. Баспытааталынан эдэркээн Василий Степанович Парников үлэлиирэ, ону таһынан история уруогар үөрэтэрэ. Үс нэһилиэк оҕолорун иллээх-эйэлээх, доҕордуу буоларга кини ыллыктаах тыллара түмпүтэ. Кини иитээччи быһыытынан кэрэни кэрэхсиирбитигэр, олох суолугар үктэнэрбитигэр үгүс үлэни ыыппыта, сүбэни биэрбитэ. Наһаа үчүгэйдик баяҥҥа оонньуура, ыллыыра, оҕолору ыллатара. Интернатынан, оскуоланан элбэх араас тэрээһин буолара. Онно барытыгар кыттан иһэрим. Мин Найахыга үөрэммит икки сылым киһи быһыытынан үүнэн тахсарбар улахан оруолламмыта. Ырыаны-тойугу сэргиир, сонун ырыа тылын тэтэрээккэ суруйар, ырыанньыгы ханна көрдүм да, атыылаһан иһэр «дьикги ыарыыга» ылларбыппын билбэккэ хаалбытым. 45 сыл анараа өттүгэр хаһыакка, сурунаалга тахсыбыт ноталаах ырыалары кырыйан уопсай тэтэрээккэ сыһыаран коллекциялаан испитим. Билигин өйдөөтөхпүнэ, дьикти дьарыкпын Василий Степанович уһугуннарбыт эбит. Кэлин көрсө түстэрбит эрэ ырыа, ырыанньык туһунан кэпсэппитинэн барааччыбыт.
2003 сыллаахха: «Өнөргө мелодистар түмсүүлэрин 25 сылынан улахан куонкурус тэрийэбин, онно ырыанньыктарын коллекциятын аҕалан быыстапкалаа эрэ», — диэн соһуппута. Мин учууталым этиитигэр улгумнук сөбүлэспитим. 150 ырыанньыкпын көтөҕөн илдьэн Өнөр кулуубугар тэлгэппитим. Ити мин киэҥ эйгэҕэ бастакы быыстапкам этэ. Онно улуус ырыа айааччыларын, биллиилээх композитор З.К. Степановы, мелодистар А. Калининскайы, В. Корякины аан бастаан илэ харахпынан көрөн, эт кулгаахпынан истэн улаханнык дуоһуйбутум. Кинилэр бэйэлэрин ырыанньыктарын баҕа санааларын суруйан бэлэхтээн миигин бу дьикти умсулҕаннаах дьарыкпар букатынаахтык сиэтэн киллэрбиттэрэ. Билигин 520 ырыанньык, 40-чэ ырыаҕа анаммыт кинигэлээх, 60-ча музыкальнай сувенирдаах балачча ситиһиилээх коллекционер буола үүннүм. Дьокуускай куоракка, Мэҥэ Хаҥаласка, Тааттаҕа, Горнайга, улууһум киинигэр, нэһилиэктэригэр хаста да кытынным. Ырыа айааччылары төһө кыалларынан пропагандалыы сатыыбын. Хас да ырыанньык тахсарыгар көмө буоллум. Итиннэ барытыгар учууталым Василий Степанович өҥөтө муҥура суох элбэх. Үгүс таһаарбыт кинигэлэрин бэлэх ууммута миэхэ көмүстээҕэр күндү!
Улаханнык убаастыыр учууталбын Василий Степановиһы 70 сааһынан итиитик-истиҥник эҕэрдэлиибин, кини сылайбат сындааһыннаах үлэтигэр өссө үрдүк чыпчааллары баҕарабын!
Марися Васильева, СР тыатын хаһаайыстыбатын туйгуна, II Лөгөй нэһилиэгин бочуоттаах олохтооҕо, «Улуус култуурата сайдыытыгар кылаатын иһин», «Уус Алдан улууһун социальнай-экономическай сайдыытыгар киллэрбит кылаатын иһин» бэлиэлэрдээх.
2015сыл.