Мин 1986 с. Илин Сибиирдээҕи Культура Институтун үнкүү салаатын бүтэрэн дойдубар, Уус-Алдаҥҥа, Бороҕон нэһилиэгэр Василий Степанович Парников салайар, Өрөспүүбүлүкэ биир саамай биллэр кэллэктиибигэр, ырыа уонна үнкүү оҕо Народнай Ансаамбылыгар «Кэнчээри» үнкүү салайааччытынан ананан үлэлии тиийбитим.
Биир эрэ сыл үлэлээн-хамсаан Василий Степанович оҕолору кытары хайдах үлэлиирин көрөн-истэн, элбэх опыт, бэйэбэр улахан суолталаах олус үчүгэй «оскуоланы» барбытым.
Дьэ, саҕаламмыта эбээт үлэ киэнэ үгэнэ, күүстээх дьарыктар, кэпсээннээх кэнсиэрдэр, арааһынай айаннар, кытаанах конкурстар….
Хас да бөлөххө саастарынан арааран, оҕолорго арааһынай үнкүүлэри туруоран, ол курдук: Монгольскай, Бурятскай, Армянскай, современнай, бальнай, сахалыы үнкүүлэри оҕолор дуоһуйа толорон, сүрдээҕин сөбүлээн, астынан, дьанаһан, умсугуйан туран дьарыктарга сылдьан, төрөппүттэр да тэбис тэҥҥэ, барытыгар көмөлөhөн, ити үнкүүлэргэ көстүүм да тиктэриитигэр, гастролга да барарбытыгар оҕолорун тэрийэн, өйүөлээн, таҥастарын –саптарын бэрийэн олус көхтөөхтүк кыттыhан, олох биир улахан ыал курдук сылдьыбыппыт.
Бу үлэлиир сылбар «Кэнчээри» 15 сылын туолан эмиэ улахан тэрээһиннэр, кэнсиэрдэр буолбуттара. София Ротару ырыатыгар «Октябрь» диэн композиция турбута. Марианна Ермолаева солисткалаабыта уонна бэйэм үнкүүлээбитим, элбэх оҕо ол үнкүүгэ кыттыбыта, бэрт интириэһинэй нүөмэр тахсыбыта.
Сайын итии, кыһын тымныы диэбэккэ үлэни, үөрэҕи аахсыбакка дьаныардаах, түмсүүлээх баҕайытык сылдьан араас буолар тэрээһиннэргэ кыттан бэйэлэрэ да астынар, өйдөөн хаалбыт түгэннэрэ элбэх буоллаҕа…
Дьэ мантан «күн» солото суох сылдьан оҕолор үнкүүгэ эрэ буолбакка үчүгэй өйдөөх-санаалаах, доруобай эттээх-сиинньээх, үрдүк культуралаах, обществоҕа туһалаах, бириэмэлэрин таба аттаран, сөпкө туһанан «Кэнчээри» аатын ааттатарга бу дьарыкка суолта биэрэн аастахтара. Василий Степанович хас кэнсиэр, тэрээһин кэнниттэн эбэһээт оҕолору мунньан анализ онорон, туох сыыһа тахсыбытын, хайдах өссө ордук буоларын уонна үөрэхтэригэр олох ситиһиилээх, үрдүк көрдөрүүлээх буолалларын санатан ирдиирэ, улэлэһэрэ уонна старосталары отчуоттатара.
Биир бэйэм «Кэнчээри» ансаамбылыгар, Василий Степанович курдук бэйэтин үлэтигэр бэрэниилээх, күүстээх, талааннаах учууталы кытары бииргэ үлэлээбиппиттэн астынабын уонна киэн туттан туран Өрөгөйдөөх Үбүлүөйүнэн Уруйдаан-Айхаллаан туран үөрэппит оҕолорбор, төрөппүттэргэ, убаастабыллаах Василий Степановичка, бары үлэhиттэргэ уонна «Кэнчээри» ансаамбыл оҕолоругар эҕэрдэни кытары истиҥ махталбын тиэрдэбин.
1986-87 сылга хореограф: Надежда Константинова
Саха Өрөспүүбүлүкэтин култууратын туйгуна;
Саха Өрөспүүбүлүкэтин култууратын үтүөлээх үлэһитэ;
Бүтүн Арассыыйатааҕы спортивнай үнкүүгэ бастакы категориялаах судьуйата.
06.02.2023с.