Мин “Кэнчээри” оҕо норуодунай, образцовай ансаамбылыгар сылдьыбытым олохпор умнуллубат биир саамай кэрэ түгэним буолар.
Мүрү 8 кылаастаах оскуолатыгар 1979 с. 3 кылааска үөрэнэ сырыттахпына, перемена кэмигэр Василий Степанович көрсөн музыка кылааһыгар ыҥыран ылан: “Сарсын куораттан хамыыһыйа кэлэр, онон сарсын кэлэҕин”, — диэн баран, “Хаарчаана” диэн ырыаны ыллатан бэлэмнээтэ. Хамыыһыйаҕа кэнсиэр көрдөрдүбүт. Ол кэнниттэн мунньах буолла, онно Москуба куоракка «Веселые нотки», «Творчество юных» диэн биэриигэ Киин тэлэбиидэнньэҕэ уһулла барарбытын иһитиннэрдилэр.
Москубаҕа көтөн тиийэн, биэс сулустаах гостиницаҕа түстүбүт. Онно дьэ, аан бастакыбын үрдүк мэндиэмэннээх дьиэлэри, мусуойдары, ВДНХ-ны көрөн сөҕүү-махтайыы, кэннибитин хайыһа-хайыһа көрүү-истии бөҕө буоллубут. Останкино студияны көрөр дьолломмуппут. Кафеҕа аһыырбыт. Онно үлэһиттэр куобах түүлээх көстүүммүтүн көрөн “кырса дуо?” диэн ыйыталларын өйдүүбүн. Тэлэбиидэнньэҕэ уһуллар репетиция саҕаланна.
Алла Пугачева кыыһынаан Кристина Орбакайтелыын сиэттиһэн киирбиппитин олох умнубаппын. Биэрии уһуллуутугар уот-күөс бөҕө буолла. Диктордар Светлана Жильцова, Владимир Ухин киирэн биллэрдилэр. Саха оҕолоруттан аан маҥнайгынан киин тэлэбиидэнньэҕэ уһуллубуппут — оҕо сааһым дьоллоох түгэнэ. Владимир Ухин интервью ылбытыгар долгуйан хаалбыппын өйдүүбүн. Светлана Жильцова-лыын улахан баҕайы төлөпүөн бэлэхтээбиттэрин олох умнубаппын. Кэнсиэр бүтүүтүгэр Владимир Ухин миигин көтөҕөн, саннытыгар олордубута.
Тапталлаах «Кэнчээри» ансаамбылбытын, салайааччыбытын Василий Степановиһы хас да көлүөнэ оҕону талаанын, дьоҕурун кэмигэр арыйан, элбэх оҕону үтүөҕэ- кэрэҕэ уһуйбутун киэн тутта, махтана саныыбыт.
Алина НИКИФОРОВА,
ансаамбыл 1987 сыллааҕы выпускницата.
Олунньу 2022 с.
Мүрү саһарҕата