Василий Степанович мин олохпор, үлэһит, педагог буолан тахсарбар сүҥкэн улахан өҥөлөөх. Оччолорго иккис кылааска үөрэнэрбит. Арай биирдэ дьүөгэм Нида Бурцева «Кэнчээригэ» оҕолору үҥкүүгэ талаллар диэн илдьэ барааччы буолла. Мин оннук ансаамбыл баарын дьүөгэбиттэн истибитим. Онтон ыла искусство биир кэрэ көрүҥүн — үҥкүүнү талан, кэлин Дьокуускайдааҕы култуура уонна искусство колледжын, Бурятия Илин Сибиирдээҕи культура уонна искусство институтун бүтэрэн, үөрэммит ансаамбылбыттан харыс да халбарыйбакка, айа-тута сылдьабын.
Ол кэмҥэ, 80-с сыллар саҕаланыыларыгар, «Кэнчээри» ансаамбыл аата Россияҕа эрэ буолбакка, аан дойдуга киэҥник биллэр этэ. Ансаамбылы төрүттээбит новатор-педагог, Россия, Саха сирин култууратын үтүөлээх үлэһитэ, биһиги улууспут бочуоттаах олохтооҕо Василий Степанович Парников, маҥнайгы балетмейстердар Зоя Гаврильевна Ксенофонтова, Елена Степановна Прокопьева бииртэн биир үрдүк ситиһии иһин улахан үлэни ыыталлара.
Маҥнайгы учууталларбар махталым муҥура суох. Е.С. Прокопьева, Н.Н. Константинова, В.А. Сивцева үҥкүү кэлэктиибэ атаҕар турарыгар сүрэхтэрин, күүстэрин бука барытын түмэллэрэ. Оттон «Кэнчээри» ансаамбылы төрүттээбит, оҕо иитиитигэр билигин даҕаны эҥкилэ суох үлэлии-хамсыы сылдьар Василий Степанович Парников педагог, уһуйааччы буолан тахсарбар көмөтө олус улахан. Кини үөрэҕэ, такайыыта иҥэн, үлэм, оҕолору кытта алтыһыым дьиҥнээх дуоһуйууну аҕалар. Биһигини учууталларбыт бириэмэни таба аттарарга үөрэппиттэрэ олоххо бэлэмнээх буоларбытыгар дьиҥнээх көмөнү биэрбит эбит. Ол иһин кинилэр үөрэхтэрин суолдьут сулус оҥостон, үлэбэр тирэнэбин.
Василий Степанович — идэтинэн история учуутала, музыкаҕа анал үөрэҕэ суох. Ол гынан баран, хайдахтаах курдук оҕолору искусство биир уустук көрүҥүн — академическай ырыаны кыайа-хото ыллыырга, толорорго үөрэтэриттэн, үлэтигэр олус бэриниилээҕиттэн, эппиэтинэстээҕиттэн сөҕөбүн-махтайабын.
Василий Степанович курдук, үлэтинэн үүнэн, үрдүк ситиһиилэнэн, дойдутун, улууһун, Сахатын сирин аар-саарга аатырдыбыт дьоммутунан киэн туттуохтаахпыт.
Ульяна Ноговицына,
«Кэнчээри» ансаамбыл үҥкүү бөлөҕүн салайааччыта,
СР култууратын, СР ыччат политикатын туйгуна
2015 сыл.