Хас бииирдии киһи оскуолаҕа үөрэммит кэмнэриттэн дьоллоох түгэннэрин өйдүүр. Мин эмиэ оҕо оҕо курдук Мүрү аҕыс кылаастаах оскуолатыгар үөрэммитим. Музыкальнай оскуолага фортепьяно кылааһын бүтэрбитим, уруһуйунан үлүһүйэн туран дьарыктаммытым.
1972 сыллаахха оскуолаҕа Василий Степанович Парников музыка учууталынан ананан үлэлии кэлбитэ. Ол күнтэн оҕо аймах кута-сүрэ ырыаҕа ыллыран оскуола оҕото улахан аҥаара ыллыыр-туойар буолбута.
Ырыаҕа биһигини Любовь Афанасьевна диэн учуутал үөрэтэр этэ. Музыкальнай инструмеҥҥа оонньообот буолан уруокпут доҕуһуола суох, айахпытынан ыллаан үөрэнэр этибит. Онтон биир үтүө күн кылааспытыгар мэниктии аҕай сырыттахпытына, биир эр киһи киирэн кэллэ уонна наһаа улаханнык баяныгар аккорд тардан кэбистэ. Биһиги соһуйан ходьох гына түстүбүт уонна уу чуумпуран хааллыбыт. «Мин Василий Степанович Парников диэммин, эһиэхэ ырыа уруогун үөрэтиэм» — диэтэ. Ол күнтэн ыла ырыа уруога биһиги саамай сөбулүүр, кэтэһэр уруокпут, дьарыкпыт буолбута.
Уруоктарбыт күнтэн күн интэриэһинэй буолан испиттэрэ. Элбэх ырыалары үөрэппиппит. Маҥнайгы, иккис, үһүс куоластарынан арахсан ыллыырга үөрэппитэ. Наһаа сөбүлүүр, астынар этибит. Соло, дуэт, трио, квартет, ансамбль, кыргыттар, уолаттар диэн туһунан арааран ыллатар этэ. Уолаттарбыт куоластара уларыйа илик буолан, синньигэс куолаһынан, киһи эрэ истэ олоруох курдук ыллыыр этилэр. Местников Петя диэн уол үөрэммитэ биһигин кытта. Ол уол ыллыырын Лучиано Паворотти курдук ыллыыр диэн сөҕөр этибит. Кыргыттар сопрано куолаһынан ыллыырбытын астынар аҕай этибит. Василий Степанович олох дьэҥкирдик ыраастык ыллыырга үөрэтэр этэ. Салгыы кини биһиэхэ музыкальнай грамотаны үөрэппитэ. Уруоктарбыт баянынан распевкаттан саҕаланар буолбуттара. Композитордары кэпсиир этэ, Аан дойдуга биллэр ырыаһыттары, композитордары үөрэтэр этэ. Ону биһиги наһаа сөбулээн, интэриэһиргээн истэрбит. Ити курдук учууталбыт тыа сирин оҕолоругар музыка уруогун биһиэхэ үөрэппитэ кэлин олохпутугар хотунан — соҕуруунан сылдьан сайдыылаах норуоттартан культураҕа туох да итэгэһэ суох сананарбыт Василий Степанович үтүетэ дии саныыбын.
Онтон биир күн оҕолору биһигини муста, мунньах ыытта. «Мин оҕо хорун тэрийиэхпин баҕарабын, туох дии саныыгыт? – диэн ыйытта. Биһиги үөрдүбүт аҕай, сөбүлэһэрбитин эттибит. Оччоҕо аатта толкуйдаан диэтэ. Элбэх ааттары эттибит, онтон куоластааһынынан «Кэнчээри» диэн ааты таллыбыт. Онон Кэнчээри диэн аат сүрэхтэниитин биһиги көлүөнэ оҕолор ааттаабыппыт.
Аны кылаас иһиттэн тахсан сценаҕа ыллыыр дьон буоллубут. Хас күн аайы репетиция. Биһиги оҕо аймах ол репетицияларга олох үөрүүнэн кэлэр этибит. Онтон салгыы гастроллар туһунан кэпсэтии буолла. Күүстээх бэлэмнэнии. Ырыаҕа эрэ буолбакка үҥкүүгэ, сценкаҕа, конферансьеҕа, сценическэй маастырыстыбаҕа диэн уһуйуллан бардыбыт. Костюммут диэн маҥан капроновай бантик, кружевной маҥан фартук, колготка уонна түүппүлэ. Туох да наһаа мааны курдук сананар этибит. Сценическай макияж диэн искусствоҕа эмиэ үөрэтэр этэ, сороҕор мөҕөн, аһара кырааскаланнахпытына, сороҕор хайҕаан син сөптөөхтүк оҥостор буолбуппут. Бастакы гастролларбыт Мындааба, Чараҥ, Майаҕас нэһилиэктэригэр этилэр. Саамай ыраата сылдьыбыт гастролларбыт Сыырдаах, Лөгөй. Оо, оччолорго Сыырдаах, Лөгөй биһиэхэ Москва курдук этилэр. Үөрүү-көтүү бөҕөтө, астыныы-дуоһуйуу… Василий Степановичтан күнтэн күн биһиги туох эрэ саҥаны кэтэһэрбит, күүтэрбит. Ону таайбыт курдук кини саҥаттан саҥаны олоххо киллэрэн иһэрэ. Ол да иһин «Кэнчээри» биир сиргэ турбатаҕа, сайдан — кэҥээн улууска, республикаҕа Россияҕа биллэр көстөр буолбута.
Хас биирдии көлүөнэ бэйэтэ сулустардаах. Биһиги көлүөнэҕэ — дьарыктаммыт кэммитигэр Зоя Гоголева, Федя Стрекаловскай, эдьиийдии балыстыы Рита, Наташа Бочкаревалар, Оксана, Лана Атласовалар, Алина Никифорова, Паша Алексеева, Гутя Копырина, Маша Сергеева, Маша Ховрова, Эльза Алексеева, Таня Белямова, Октя Басыгысова, Петя Местников, Вася Александров, Сережа Константинов этилэр.
Күндү “Кэнчээри” иитиллээччилэрэ, оҕо сааспыт умнуллубат кэрэҕэ кынаттыыр оҕо ансамбыла 50 сылынан барыгытын эҕэрдэлиибин! Түгэнинэн туһанан убаастыыр, талааннаах учууталбар Парников Василий Степановичка ытык тыллары этэн тураммын, сүгүрүйэбин, махтанабын!
Охлопкова Рея Васильевна, В.В.Алексеев аатынан “Уолан” гимназия директоры солбуйааччыта,
СӨ үөрэҕириитин туйгуна, РФ үөрэҕириитин Бочуоттаах үлэһитэ,
Уус-Алдан улууһун Бочуоттаах олохтооҕо.
Тохсунньу 17 күнэ, 2023 сыл.