Олоххор үтүө киһини көрсүү — киһи олоҕун баайа. Кинилэр эн олоххор суолталаахтар, эн киһи буолан улаатаргар оруоллаахтар. Оннук киһинэн ааҕабын учууталбын Василий Степанович Парникову. Кэрэни кэрэхсииргэ, ырыаны ыллыырга, сценаҕа, дьон иннигэр ыллыырга-туойарга үөрэппитэ учууталым.
Кинини аан бастаан кыра кылааска үөрэнэ сылдьан, музыка уруогар көрбүтүм. Баяннаах киһи киирэн кэлбитэ. Мэниктии сылдьар оҕолорго баянын тардан тыас таһаарбытыгар биһиги соһуйан өрө көрө түспүппүт. Дьиктиргээн чуумпуран хааллыбыт. Салгыы билсиһии, нотнай грамотаны үөрэтии, дорҕооннору таһааран ыллыырга, тыынарга үөрэтии. Барыта наһаа сонун, дьикти этэ. Онтон ыла музыка уруога саамай кэтэһиилээх, күүтүүлээх уруок буолбута.
Маны таһынан Василий Степанович оҕолорго хор тэрийбитэ. Биһиги бары үөрүүнэн киирбиппит. «Кэнчээри» диэн аатынан ансаамбылы аан бастаан биһиги сүрэхтээбиппит. Оччолорго оҕо ыллыыр эрэ буолбатах этэ, кини концеры ыытар, ыллыыр, үҥкүүлүүр, сценкаҕа оонньуур буолара.
Бастакы гастролбутунан чугастааҕы Мындааба, Чараҥ, Майаҕас буолбуттара. Саамай ырааппыппыт Сыырдаах этэ. Билигин санаатахпына, Сыырдаах биһиэхэ Москваҕа баран кэлбит курдук буолара.
Василий Степанович биһигини ыллыырга эрэ буолбакка, бэрээдэккэ, эппиэтинэстээх буоларга, сатаан бэйэбитин тэринэргэ үөрэтэрэ, араас бэсиэдэлэри ыытара. Аан дойдуга туох буола турарын барытын ырытара уонна түмүгэр хайаан да тус санааҕын ыйыталаһан истэр буолара. Бу барыта — үрдүк ааттаах учуутал үлэтин туоһута.
Василий Степанович үөрэппит оҕолоро киниэхэ махталбыт муҥура суох. Кини биһиэхэ барыбытыгар ырыа-тойук, үҥкүү аргыстаах умнуллубат оҕо сааһы бэлэхтээбитэ. Мин тус олохпор маннык киһини көрсүбүппэр махтанабын. Киниэхэ олоҕор үтүөнү эрэ баҕарабын.
Рея Охлопкова,
В.В. Алексеев аатынан уолаттар гимназияларын дириэктэри солбуйааччы, РФ орто уөрэхтээһинин бочуоттаах үлэһитэ, СР үөрэҕириитин туйгуна
2015 сыл