1987 сыллаахха сайын «Кэнчээри» ансаамбыл Ханалас улууһугар гастроллуу кэлэ сылдьыбыта. Кэнсиэр кэмигэр уус-уран салайааччы Василий Степанович баҕалаах, талааннаах оҕолору сүүмэрдиибит диэбитин иһиттим-истибэтим, тута ол киэһэ кинилэр түспүт ыалларыгар ийэбинээн тиийбиппит.
Сайыҥҥы чуумпу киэһэ ансаамбыл оҕолоро бары салайааччыларын кытта таһырдьа мунньахтыы олороллоро. Кэнники билбитим, хас кэнсиэр кэнниттэн Василий Степанович «итог дня» ыытар эбит. Ааспыт кэнсиэри ырытан, сыыһалары ыйан эбэтэр үчүгэй өрүттэри өрө тутан, сырыы аайы тупсан иһэргэ үлэ барара. Ол киэһэ үҥкүүлээн да көрдөрбүтүм, ыллаан да ылбытым. Дьэ, уонна баҕалаах буоллаххына, күһүн кэтэһэбит диэн диэн хоруйу ылан, үөрэн-көтөн, ол күһүн Бороҕон олохтооҕо буолан, ансаамбылга үҥкүүгэ, ырыаҕа дьарыктанан саҕалаабытым.
Василий Степанович музыка кэрэ эйгэтигэр миигин аан бастаан сиэтэн киллэрбит киһи буолар. Классическай музыканы билиһиннэрбит, академическай ырыа диэн тугун, саха оҕото бу ньымаҕа ыллыан сөбүн дакаастаабыт, үөрэппит учууталбынан киэн туттабын. Оскуола саҕаттан саҕалаан ырыаҕа өр үөрэнэн, ырыаны идэ оҥостон, Ураллааҕы консерваторияны ситиһиилээхтик үөрэнэн бүтэрэн, билигин Суорун Омоллоон аатынан Опера уонна балет театрын хорун артыыскатынан үлэлиибин.
Ансаамбылга ырыаҕа, үҥкүүгэ, сыанаҕа хайдах тутта-хапта сылдьарга үөрэнэрбит таһынан өссө дьиссипилиинэҕэ, эппиэтинэстээх буолууга, тас эрэ буолбакка, ис култуурабытын эмиэ сайыннаран, элбэх оҕолоох кэлэктиипкэ сылдьан, дьону кытта биир тылы булар үөрүйэҕим олохпор, үлэбэт үтүө көмө эрэ буоларыгар саарбаҕалаабаппын.
Ытыктыыр, тапталлаах учууталбын өрөгөйдөөх үбүлүөйүнэн итиитик-истиҥник эҕэрдэлиибин! Махталы кытта баҕарыам этэ чэгиэн туругу, олоҕун сыалынан оҥостубут өр сыллаах үлэтэ оҕоттон оҕоҕо бэриллэн, үйэлэргэ уруйдана эрэ турдун!
Айталина Пантилова,
М. Мусорскай аатынан Ураллааҕы консерватория выпускнига,
Суорун Омоллоон аатынан Опера уонна балет театрын хорун артыыһа
2015 сыл.