1972 сыллаахха Мүрү аҕыс кылаастаах оскуо-латыгар «Кэнчээри» ырыа-үҥкүү ансаамбыла тэриллэн, элбэх оҕо, ол иһигэр бииргэ төрөөбүт эдьиийим Маша сылдьара. Ийэм Екатерина Егоровна Павлова сүбэтинэн 2-с кылаастан хорга сылдьыбытым. Ортоку сүһүөххэ тахсан, улахан оҕолору кытта бииргэ оптуорунньук, бээтинсэ, баскыһыанньа күннэргэ дьарыктанарбыт.
Ырыа кылааһыгар киирдэхпинэ, омук, нуучча, саха композитордарын мэтириэттэрэ, пианино музыка кэрэ эйгэтигэр угуйаллара. Салайааччыбыт Василий Степанович дьарык саҕаланна да, анал сурунаалга баар оҕолору бэлиэтиирэ. Оҕо хойутаан кэлэрин сөбүлээбэтэ, ол иһин эрдэ кэлэн, миэстэбин булан олорорум. Василий Степанович идэтинэн история учуутала буолан, аан дойду балаһыанньатын билиһиннэрэн, үөрэх, бэрээдэк боппуруостарыгар болҕомтотун ууран, дьарыкпыт саҕаланара. Распевка, салгыы нотанан, куолаһынан арааран, ырыаны ыллыырга үөрэтии буолара. Олус сөҕөрүм — Василий Степанович хайдах баян доҕуһуолунан үс куоласка арааран, хас биирдии куолаһы кытта үлэлэһэн, олус үчүгэйдик ыллыырга үөрэтэрин. Элбэх куолас быыһыгар ким сыыһа ыллыырын тутатына истэрэ. Ону дьэ, сыыһа ыллаамаары кыһаллыы бөҕө буоларбыт. Ити курдук, сахалыы, нууччалыы, омуктуу хас да куолаһынан ыллыырга үөрэнэн, араас таһымнаах элбэх концерга, куонкуруска кыттыбыппыт.
Мин билигин салайааччыбыт олус элбэх оҕону ССРС, Россия араас куораттарыгар улахан концертарга кытыннаран илдьэ сылдьыбытынан киэн туттабын. Бу — олус улахан эппиэтинэс. Ханна да сырыттарбыт, ааһан эрэр күнү ырытан, «Итог дня» диэн ыытара. Манна ким тугу сыыспытын, туох кыаллыбатаҕын, тугу ситиспиппитин сиһилии ырытан кэпсэтэрбит. Кэпсэтии улахан тэтэрээккэ барыта суруллара. Ити тэтэрээккэ кииримээри, болҕомтолоохтук сылдьарбыт, этиллибити толорорбут. Күннээҕи түмүк хас биирдии оҕону бэрээдэккэ, бириэмэни сөпкө туһанарга иитэр-үөрэтэр суолталааҕын, олус туһалааҕын билигин өйдүүбүн, сыаналыыбын.
«Кэнчээригэ» сылдьыбыт кэмнэрбин оҕо сааһым биир кэрэ ыллыгынан, саамай дьоллоох кэмнэринэн ааҕабын. Ол курдук, Ленинградка грампластинкаҕа уһуллубуппутутар, Москваҕа «Россия» гостиница концертнай саалатыгар концертаабыппытыгар, Бүтүн Сойуустааҕы «Артек» лааҕыр 60 сыллаах үбүлүөйүн көрсө «Салют мир, Салют фестиваль!» аан дойдутааҕы сезонугар араас омук оҕолорун кытта сынньаммыт күннэрбэр, 1982 сыллаахха Москва куоракка ыытыллыбыт Саха сирин литературатын уонна искусствотын Күннэригэр кыттыбыппар, күндү салайааччыбар Василий Степановичка барҕа махталбын этэбин.
«Артек» лааҕырга барарга эрдэттэн бэлэмнэммиппит. Английскай тылынан кэпсэтэргэ, ырыа, хоһоон ааҕарга үөрэммиппит. Ансаамбыл бастакы выпускницата Рея Васильевна Охлопкова сайыҥҥы каникулугар анаан кэлэн, биһигини омук тылыгар үөрэппитэ. Омук тылын үөрэппиппит салгыы олус туһалаабыта: дэриэбинэттэн сылдьар саха оҕолоро кыбыстыбакка, хаалсыбакка, араас омук оҕолорун кытта куонкурустарга, күрэхтэһиилэргэ ситиһиилээхтик кыттан, элбэх оҕо «Артек» лааҕыр мэтээллэринэн наҕараадаламмытара. Мин хоһоон ааҕан, хомуска оонньоон, Спортландияҕа кыттан, 5 мэтээллээх кэлбиппиттэн, «Артек» лааҕыр тэниччи тардыллыбыт знамятын таһыгар хаартыскаҕа түһэр чиэскэ тиксибиппиттэн олус үөрбүтүм уонна киэн туттубутум. Уонна бу ситиһиилэрбит Сахабыт сиригэр, төрөөбүт улууспутугар, үөрэнэр оскуолабытыгар ананар диэн астына, киэн тутта, долгуйа саныырым.
Ансаамбылбыт салайааччылара иитиллээччилэрин аҥаардас ыллыырга, үҥкүүлүүргэ эрэ үөрэппэтэхтэрэ. Хас биирдии дьарык, концерт, ыраах айан олоххо эппиэтинэстээх буоларга, саҕалаабыт дьыаланы тиһэҕэр тиэрдэргэ, дьоҥҥо, тулалыыр эйгэҕэ болҕомтолоох буоларга үөрэтэрэ. Биһиги ансаамбылбытыгар бэйэни салайыныы диэн өйдөбүл эмиэ баара. Ансаамбылбыт Сүбэлээх этэ. Сүбэ кыттыылаахтара дьарыгы көтүппүт, үөрэҕэр мөлтөөбүт оҕолору кытта аһаҕастык кэпсэтэрбит. Маннык кэпсэтиилэр оҕоҕо олус туһалаахтык дьайаллара. Ыраах айаҥҥа бардахпытына, кыра оҕолору улахаттар көрөллөрө, кинилэргэ көмөлөһөллөрө. Ансаамбылга сылдьыбыт оҕолор үөрэхтэригэр, спорка өрүү инники сылдьаллара. Элбэх хонуктаах ыраах концертарга бардахпытына, хас биирдии оҕо учууталларыттан дьиэтээҕи сорудах ылан, үөрэҕин ситиһэрэ. Кэнники бэйэм педагог, салайааччы буолан, Василий Степанович иитии- үөрэтии хайысхатыгар туттар ньымаларын үлэбэр туһанабын. Өрүү толкуйдуубун, элбэх оҕону кытта үлэлииргэ, чопчу ирдэбил эрэ баар буоллаҕына, барыта ситиһиилээх, түмүктээх буолар эбит диэн.
Ансаамбылга сылдьан искусство, театр элбэх артыыһын кытта биир концерга кыттан ылбыппыттан олус дьоллоохпун. Кинилэр ааттарын киэн тутта, астына ааттыыбын: хормейстер, дирижер Феврония Баишева, балетмейстер Алексей Попов, саха национальнай оркестрын дирижера Николай Кисленко, хореограф Василий Винокуров, дойду биллиилээх артыыстара София Ротару, Лев Лещенко, Валентина Толкунова, Киин радио уонна телевидение оҕолорго Улахан хора, Сахабыт сирин биллиилээх ырыаһыттара Марина Попова, Иван Степанов, Семен Оконешников, балерина Наталья Христофорова уо.д.а.
Киэн тутта, астына бэлиэтиибин ансаамбылга сылдьыбыт выпускниктары: Валентина Сивцеваны, Марианна Ермолаеваны, Ульяна Ноговицынаны, Туяра Тарскаяны, Инга Ильинаны — төрөөбүт улуустарыгар искусство кэрэ эйгэтигэр оҕолору уһуйааччылары; саха эстрадатын чыпчаалыгар тахсыбыт, ансаамбылга бииргэ сылдьыбыт, биир оскуолаҕа үөрэммит оҕолорбутун Анастасия Готовцеваны, Лина Акимованы, Варя Аманатованы, Айта Носованы, Толя Бурнашевы — СР үтүөлээх артыыстарын, үҥкүүһүт Маргарита Самсонованы — Дьокуускай куоракка олорор, үлэлиир выпускницалары түмэн, «Алаас кыргыттара» ансаамбыл тэрийээччини.
Бу ситиһиилэр ытыктыыр салайааччыбыт Василий Степанович Парников элбэх сыллаах, сыралаах үлэтин түмүгэ буолаллара саарбаҕа суох. Улахан ситиһии киһиэхэ кэлэр, өскөтүн аттыгар эйигин өйдүүр, өйүүр дьон баар буоллахтарына. Ансаамбылга сылдьыбыт кэмнэрбэр Василий Степанович үлэтигэр күүс-көмө, өйөбүл буолбут дьонунан мин бэлиэтиибин кинини кытта бииргэ үлэлээбит хореографтар Зоя Гаврильеваны, Елена Прокопьеваны, концертмейстер Иван Баишевы, хормейстер Антонина Гурьеваны уо.д.а.
Үтүө-мааны салайааччыбар, Василий Степановичка, бараммат барҕа махталбын өрүү этэбин. Күндү учууталым, этэҥҥэ чэгиэн- чэбдик, чиргэл буол. Эйиигин куруук Айыылар араҥаччылыы сырыттыннар! Эйиэхэ уонна Эн дьиэ кэргэҥҥэр өрүү сырдык эрэ сыдьаайдын, кэрэ эрэ кэккэлэстин.
Лена Павлова, СР үөрэҕириитин уонна СР ыччакка политикатын туйгуна,
Бүтүн Россиятааҕы баһаатайдар куонкурустарын кыайыылааҕа, Мүрү нэһилиэгин баһылыгын солбуйааччы
2015 сыл.