Аҕас-балыс Туйаара, Саргылаана Павловалар Майаҕас бөһүөлэгиттэн төрүттээхпит. Аҕабыт Павлов Степан Степанович — РСФСР кинематографиятын туйгуна, ийэбит Павлова Наталья Семеновна — СР култууратын туйгуна. Култуура эйгэлээх төрөппүттэрдээх оҕолор кыра сааспытыттан сыанаҕа тахсыбыппыт, ыллыыр-үҥкүүлүүр, туойар этибит.
«Кэнчээри» оҕо норуодунай ансаамбылын хоругар улахан кылааска тахсан баран кэлбиппит. Үрдүк искусство айымньыларын — классиканы, саха мелодистарын, саха норуодунай ырыаларын, бырааттыы омуктар ырыаларын үөрэтэн, полифония дьикти кэрэтигэр куустаран барбыппыт. Учууталбыт Василий Степанович олус элбэххэ үөрэппитэ, ииппитэ. Гастролга сырыттахпытына, концерт иннинэ: «Көрөөччүлэр олус талааннаах оҕолору — эһигини көрөн, улаханнык үөрэн, өрө көтөҕүллэн сарсыҥҥаттан өссө таһаарыылаахтык үлэлиэхтэрэ. Концерт оннук улахан суолталаах», — диэн эппитин билигин сыанаҕа хас тахсыам иннинэ санаан кэлэбин. Уонна ыытааччы концерт барыытын таһымын 50%-нын быһаарарын, кини туттан киирэриттэн, нүөмэри хайдах биллэрэриттэн дьон толорооччуну ылыныыта олорчу тутулуктааҕын быһаарбыта. Сценарийы суруйа үөрэммиппит, актыыпка үлэлээбиппит, ансаамбылга сылдьан ылбыт үөрүйэхтэрбит барыта олохпут устата төһүү күүс буолбуттара. Билигин да «Кэнчээрибит» үбүлүөйдээх тэрээһиннэригэр ыытааччы уонна сценарийы суруйааччы быһыытынан үөрүүнэн кыттабын. Ол курдук, мин саҥарар-ыытар дьоҕурум телестудияҕа дииктэринэн үлэлиирбэр, бэйэбин булунуубар олук буолбута. Балтым Саргылаана оскуола кэнниттэн М. Жирков аатынан музыкальнай училищены, онтон М. Мусоргскай аатынан консерваторияны, аспирантураны бүтэрэн, Суорун Омоллоон аатынан Опера уонна балет государственнай театрын солискатынан үлэлиир. Итиэннэ музыкальнай колледжка преподавателлиир. Театрга элбэх, ол иһигэр сүрүн, партиялары толорор, үрдүкү искусство үлэһитэ. Мин билигин СР Национальнай библиотекатын кыраайы үөрэтэр салаатыгар үлэлиибин. Ырыаһыт быһыытынан куонкурустарга кыттаммын: «Мүрү- 2002» — II степеннээх дипломант, «Ыллаа, туой, эдэр саас» — I степеннээх лауреат, «Эдэр саас ырыалара» — Гран-при, улуустааҕы «Деловая леди» куонкуруска кыайыылаах буолбутум.
Олохпутугар төһүү буолбут ансаамбылбытыгар, учууталбытыгар Василий Степановичка махталбыт муҥура суох.
Туяра Павлова,
СР Национальнай библиотекатын кыраайы үөрэтэр салаатын үлэһитэ
2015 сыл