Василий Степанович Парников өр сылларга үүнэр көлүөнэ ыччаты кэрэ эйгэтигэр угуйууга үгүс сыратын, кыһамньытын ууран, үлэлээн кэллэ. Кини ииппит, үөрэппит, кэрэҕэ уһуйбут ыччаттара дойду араас муннуктарыгар учууталларын аатын үрдүктүк тутан үлэлии-хамсыы, айа-тута сылдьаллар. Василий Степановиһы саха оҕото талааннааҕын, ылсыспыт дьыалатын ситэрэр уратылааҕын, кэрэ эйгэтигэр ханнык баҕарар омуктары кытта тэҥҥэ алтыһан, ыллыыр-туойар дьоҕурдааҕын дакаастаабыт ураты киһинэн сыаналыыбыт.
Оҥоһуллубут үлэттэн дуоһуйан хаалбат ураты айылгылаах, күнтэн күн саҥаттан саҥаны, сонуну олоххо киллэрэн иһэр. Саха оҕотун опера курдук искусство уустук эйгэтигэр сыһыаран эрэриттэн үөрэбит, астынабыт. Василий Степанович үлэҕэ көрсөр уустуктартан, өйөспөт, өйдөспөт буолууттан санаатын түһэрбэккэ, оҕо туһугар куруутун иннин диэки эрэллээхтик баран иһэр. Саха бастакы Президенэ Михаил Николаев «Музыка — барыбытыгар» бырайыагын олоххо киллэриигэ үлэлэһэ сылдьарыттан үөрэбит уонна саҕалаабыт үлэтэ үтүө түмүктээх буолуоҕар эрэнэбит.
Уус Алдан улууһугар 30 сылы быһа мелодистары түмэн, үгүс элбэх ырыа айааччыны иитэн таһаарда. Уһун сылларга сыралаһан үлэлэспит мелодистара улууска, республикаҕа биллэр үлэлээх-хамнастаах дьон буоллулар. Ким Колодезников, Иван Аргунов, Юрий Сивцев, Станислав Луковцев уо.д.а. айбыт ырыаларын дьон-сэргэ сөбүлээн толорор. Улуус, республика араас таһымнаах тэрээһиннэригэр улууспут мелодистара көхтөөх кыттыыны ылаллар.
1994 сыллаахха Түүлээххэ айар киэһэбин ыыппыппар оройуон кииниттэн телевидение үлэһиттэрин илдьэ тиийэн, миэхэ, айар үлэнэн саҥардыы дьарыктанан эрэр киһиэхэ, улахан өйөбүлү оҥорбута. Онтон кынат анньынан билигин республика Ырыа айааччыларын сойууһун уонна бырабылыанньатын чилиэнэ буоллум. 2008 сыллаахха улуус мелодистарын түмсүүтүн салайааччытынан мэктиэлээн үлэлии сылдьабын. Улуус мелодистарын айар киэһэлэрэ кини кыттыыта суох ааспаттар. Түбүктээх үлэтиттэн быыс булан, биһиэхэ сүбэ-ама, күүс-көмө, өйөбүл буолар.
Дьоҕурдаах оҕоҕо Василий Степанович ураты болҕомтолоохтук сыһыаннаһар. Кинилэр культура эйгэтигэр хас биирдии хардыыларын кыраҕытык кэтээн көрөр уонна кыра да ситиһиилэриттэн үөрэр. Оннук гынан кини оҕо дьоҕура сайдыытыгар олук уурар. Биһиги уолбут Вася олох кыра эрдэҕиттэн үҥкүүнэн сөбүлээн дьарыктанар. «Кэнчээри» оҕо норуодунай ансаамбылыгар дьарыктанан, салгыы Арктикатааҕы культура уонна искусство институтугар хореография салаатын бүтэрэн, үөрэммит институтугар преподавателинэн анаммыта. Билигин Ийэ дойдутугар ытык иэһин төлөөн, аармыйаҕа сулууспалыы сылдьар. Олох араас түгэннэригэр ансаамбылга ылбыт сатабыла, үөрүйэҕэ күүс-көмө буолаллар. Василий Степанович оҕобут ситиһиитин туһунан «Мүрү саһарҕата», «Эдэр саас» хаһыаттарга ыстатыйа суруйан бэчээттэппититтэн биһиги, төрөппүттэрэ, үөрэбит уонна махтанабыт. Ону тэҥэ ансаамбыл 40 сыллаах үбүлүөйүн бэлиэтиир киэһэҕэ Василий Степанович өйөөһүнүнэн биһиги оҕобут СР бастакы Президенин Михаил Ефимович Николаев илиититтэн академик В.П. Ларионов аатынан кыһыл көмүс мэтээли туппута. Бу учуутал үөрэнээччитигэр, уһуйуллааччытыгар үрдүк итэҕэлэ. Вася настаабынньыгын, учууталын итэҕэлин түһэн биэриэ суоҕа диэн эрэнэбит.
Актыыбынай позициялаах аҕа табаарыспыт биһиэхэ барыбытыгар холобур буолар. Василий Степановиһы кытта айар үлэ ыллыгар көрсүбүтүм мин олоҕум, үлэм хайысхатыгар улахан суолталаах дии саныыбын.
Василий Петухов,
СР култууратын туйгуна, СР Ырыа айааччыларын сойууһун уонна бырабылыанньатын чилиэнэ, Уус Алдан мелодистарын тумсуутун салайааччыта
2015 сыл.