Саха дьоно үксэ аар-саарга аатырбыт Россия үтүөлээх “Кэнчээри” оҕо ырыа-үҥкүү народнай ансаамбылы билэр буолуохтаах. Мин бу ансаамбылга сылдьыбыппын олус күндүтүк саныыбын. Ансаамбылга үҥкүүгэ дьарыктаныым кэлин идэбин таларга олук буолбута. Ол курдук, бэһискэ үөрэнэ сылдьан Ульяна Петровна Ноговицына уонна Марианна Петровна Ермолаева салайар үҥкүү бөлөҕөр киирэн дьарыкпын саҕалаабытым. Наһаа элбэх оҕону кытта алтыһан, үҥкүү кэрэ эйгэтигэр уһуйуллан олус элбэҕи билбитим, элбэххэ үөрэммитим, сайдыбытым. Дьарыктар наһаа интэриэһинэйдик барааччылар. Саҥаттан саҥа үҥкүүлэри үөрэтэн иһэрбит. Үөрэтээччилэрбит олус ирдэбиллээх этилэр. Төһө да эстэ-быста сылайдарбыт эппиттэрин барытын толорор этибит. Улуус, республика таһымнаах элбэх тэрээһиннэри ырыанан, үҥкүүнэн киэргэтиигэ биһиги ансаамбылбыт күүскэ үлэлэһэр этэ. Ырыаһыттары кытта быстыбат ситимнээхтик бииргэ дьарыктанар этибит. 2009 сыллаахха улууспутугар ыытыллыбыт республикатааҕы Олоҥхо ыһыаҕар Дьулуруйар Ньургун Боотур олоҥхоттон быһа тардыыны толорбуппут үтүө өйдөбүл буолан хаалбыт. Сыл аайы үөрэх дьыла бүтүүтүгэр отчуоттуур кэнсиэрбит үрдүк таһымҥа толору көрөөччүлэрдээх ыытыллааччы. Элбэх араас конкурстарга кыттан кыайыы өрөгөйүн билээччибит.
Ансаамбылбыт биэстии сыл буола-буола үбүлүөйүн бэлиэтиир, үлэтин-хамнаһын дьон иннигэр отчуоттуур үтүө үгэстээх. Ансаамбыл салайааччыта РСФСР, Саха Республикатын культуратын үтүөлээх үлэһитэ Василий Степанович Парников ансаамбыл салгыы сайдарыгар туох баар кыһамньытын, күүһүн-уоҕун, өйүн-санаатын ууран кэллэ. Ансаамбыл 40 сыллаах үбүлүөйүгэр Саха Сирин бастакы Президенэ Михаил Ефимович Николаевтан академик Владимир Петрович Ларионов аатынан Кыһыл көмүс мэтээли туппутум. Бу миэхэ үрдүк итэҕэли биэрэн наҕараадаҕа түһэрбит ансаамбылбыт салайааччытыгар Василий Степановичка махталым муҥура суох. Ансаамбыл салайааччыта РСФСР, Саха Республикатын культуратын үтүөлээх үлэһитэ Василий Степанович Парников ансаамбыл салгыы сайдарыгар туох баар кыһамньытын, күүһүн-уоҕун, өйүн-санаатын ууран кэллэ. Ансаамбыл хас биирдии чилиэнигэр биир тэҥник аҕалыы амарахтык сыһыаннаһара, болҕомтотун уурара. Өрүү үөрэтэ-такайа, кэрэ эйгэтигэр уһуйа, олоххо буолар уларыйыылары куруутун билиһиннэрэ сылдьааччы. Ансаамбыл Россияҕа, Аан дойдуга тиийэ биллэригэр сүҥкэн кылаатын киллэрбит чулуу киһинэн сыаналыыбыт. Оскуоланы бүтэрэр сылбытыгар Айыы Куо Гуляевалыын айар кэнсиэрбитин ансаамбылбыт коллектива наһаа үчүгэйдик тэрийбитэ. Онтон кынаттанан салгыы Арктикатааҕы культура институтугар киирэн хореограф идэтин баһылаабытым. Үөрэхпин бүтэрэн баран институппар преподавателинэн үлэлээбитим. Ийэ дойдубар ытык иэспин толорон кэлэн баран, аҕыйах ахсааннаах хотугу норуоттар театрдарыгар артыыһынан киирэн үлэлии сылдьабын. Үҥкүү абылаҥар уһуйбут “Кэнчээрим” бары иитээччилэригэр, хореографтарбар Ульяна Петровнаҕа, Марианна Петровнаҕа, барыбытыгар үтүө холобур буола сылдьар салайааччыбытыгар Василий Степановичка махтал истиҥ тылларын аныыбын, этэҥҥэ буолууну баҕарабын.
Саха Республикатын культуратын туйгуна, академик В.П. Ларионов аатынан Кыһыл көмүс мэтээл хаһаайына,
аҕыйах ахсааннаах хотугу норуоттар театрдарын артыыһа, “Гулун” ансаамбыл туруораачы-балетмейстера,
ансаамбыл 2009 сыллаах выпускнига Василий Петухов
08.02.2023 сыл.