Мин Василий Степановиһы кытта 1978 сыллаахтан, мелодистар түмсүүлэриттэн саҕалаан, 40-ча сыл бииргэ алтыһан кэллим. Кини күн бүгүнүгэр диэри «Кэнчээри» ансаамбылын үрдүктэн үрдүккэ таһааран, ону тэҥэ мелодистары кытта утумнаахтык, айымньылаахтык үлэлии сылдьар, барыбытыгар холобур буолар.
1983 сылтан Сыырдаах орто оскуолатыгар музыка учууталынан үлэҕэ киирбитим. «Дьүкээбил» ырыа ансаамбылын тэрийбитим. Оччолортон аатырар «Кэнчээри» ансаамбыл академическай ньыманан ыллыырын кэрэхсиир этим. 1985 сыллаахха Василий Степановичтан көрдөһөн, кэпсэтэн, уопут ыла, 20-чэ үөрэнээччибин илдьэ таһаҕас массыынанан айаннатан, Бороҕоҥҥо киирбиппит. Кини ансаамбылын оҕолорун хайдах, туохтан саҕалаан бэлэмниирин көрөн-истэн, элбэҕи туһанан кэлбитим. Сүүрбэттэн тахса сыл музыка учууталынан үлэлээн, оҕо саадым иитиллээччилэрэ, оскуолам оҕолоро, ансаамбылым, ыччаттарым ырыа кэрэ эйгэтигэр балачча элбэх ситиһиилэммиппит.
Оҕобут Катя Протопопова сырдык кэриэһигэр 1995 сылтан академическай ырыа куонкуруһун тэрийбитим. Куонкурус балаһыанньатын Василий Степанович оҥорон биэрбитэ. Бу куонкуруһу уон сыл ыыппыппыт. Маҥнай «Кэнчээри» уонна Сыырдаах оскуолата эрэ кыттыбыт буоллахтарына, кэлин отуттан тахса оскуолаттан, алта улуустан 300-кэ оҕо, ыччат кыттыбыта, элбэх үлэ барбыта.
Билигин мин дьыалабын төрөппүт кыргыттарым салҕаан, Надежда Протопопова, Алита Мигалкина культура эйгэтэ үөрэхтэннилэр. Элбэх ситиһиилээхтэр. Надежда Найахы хоругар хормейстердаабыта, республикаҕа хаста даҕаны «Бастыҥ хормейстер» аатын сүкпүтэ. Үөрэппит оҕом, балтым Яна Протопопова эмиэ хормейстер, Бороҕоҥҥо ситиһиилээхтик үлэлиир.
Оскуола оҕото сылтан сыл улаатан, үөрэҕин бүтэрэн баран иһэр. Саҥаттан саҥа саҕалааччылары иитэн-үөрэтэн таһаарарга элбэх түбүк, кыһамньы ирдэнэр. Василий Степанович бу уһун кэм устата туох баар сыратын, олоҕун анаан, хорсуннук, таһаарыылаахтык үлэлээн, үтүө аата ааттанан, үрдүк сыанабылы ылбыта. Бу үлэлиирбит, алтыһарбыт тухары төһөлөөх элбэх араас таһымнаах ааттаах-суоллаах куонкурустар, фестиваллар, концертар, бырааһынньыктар, семинардар, тематическай биэчэрдэр, о.д.а. тэрээһиннэр буолбуттарын ааҕан сиппэккин. Элбэх кинигэни таһаарбыт кэрэхсэнэр мелодист, салайааччы Василий Степанович — мин аҕа табаарыһым, учууталым, ытыктыыр киһим.
Николай Протопопов,
СР култууратын туйгуна, «XXI үйэ учуутала» үрүк көмүс, «СР норуотун уус-уран айымньытыгар кылаатын иһин»
бэлиэлэр хаһаайыннара, Бэрт Ууһун нэһилиэгин бочуоттаах олохтооҕо
2015 с.