Биһиги Василий Степановиһы кытары Уус Алдаҥҥа Олоҥхо ыһыаҕа ыытыллар сылыгар билсибиппит. Кини куоласпытын истэн баран, «Кэнчээри» ансаамбыла «Дьулуруйар Ньургун Боотур» олоҥхону Суорун Омоллоон либреттотынан опера туруораары сылдьарын сиһилии кэпсээн баран, «сүрүн оруолларга эһигини ылаары гынабын» диэбитигэр, биһиги тута сөбүлэспиппит.
Онтон ыла ыһыах инниттэн, «Кэнчээри» лааҕырыгар сылдьан, күүскэ бэлэмнэммиппит. Бухатыыр хамсаныытын, саҥатын-иҥэтин, уобараһын толору арыйарга бастакы холонор дьоҥҥо бастаан утаа ыарахаттардаах этэ. Ол да буоллар, күүстээх бэлэм түмүгүнэн, Олоҥхо ыһыаҕар ситиһиилээхтик кыттан, ол сыл кыһыныгар киирэн, «Саха» Национальнай көрдөрөр-иһитиннэрэр хампаанньатыгар уһуллубуппут. Биһиги алтыһыыбыт манан эрэ түмүктэммэккэ, араас улуустарга буолар Олоҥхо ыһыахтарыгар барытыгар тэҥэ уонна араас улууспут тэрээһиннэригэр операбытын ситиһиилээхтик дьоҥҥо-сэргэҕэ көрдөрбүппүт, иһитиннэрбиппит.
Василий Степанович ылыммыт үлэтин тиһэҕэр тиэрдэр ирдэбиллээх учууталынан сыаналыыбыт. Билигин да сибээспитин быспакка, төһө кыалларынан араас тэрээһиннэргэ бииргэ кыттабыт. «Кэнчээри» ансаамбылыгар сылдьаммыт, үгүс доҕордоммуппут-атастаммыппыт, элбэххэ үөрэммиппит-такайыллыбыппыт. Үөрэхпитин таларбытыгар Василий Степанович элбэх өҥөлөөх диэн бэлиэтиэхпитин баҕарабыт.
Оҕо сааспыт кэрэ-бэлиэ кэмнэрин үтүө өйдөбүлүн бэлэхтээбит киһибитигэр Василий Степановичка муҥура суох махтанабыт уонна сүгүрүйэбит. Өссө да биһиги улууспут, өрөспүүбүлүкэбит култууратын, духуобунай сайдыытын киэҥ аартыкка салайа турарыгар баҕарабыт.
Михаил ПУХОВ,
М.К. Аммосов аатынан ХИФУ ХИНТуоКИ 5 кууруһун устудьуона,
Афанасий ОЛЕСОВ,
М. Н. Жирков аатынан Музыкальнай колледж 4 кууруһун устудьуона, Опера уонна балет театрын хорун артыыһа
2015 сыл