Василий Степанович Парникову аатырбыт «Кэнчээри» салайааччытын быһыытынан киһи барыта билэр. Мин кинини кытта 1984 сылга Мүрү 8 кылаастаах оскуолатыгар үлэлии тии-йэн баран, үчүгэйдик билсэн, баччааҥҥа диэри үлэнэн алтыһан кэллибит.
Оччолорго «Кэнчээри» номнуо ааттаах-суоллаах ансаамбыл этэ. Төрөппүттэр күүскэ өйүүллэрэ: оҕолор таҥастарын-саптарын бэйэлэрэ тигэн, тэрийэн улаханнык көмөлөһөллөрө. 1985 сыллаахха Ленинградка баран, ситиһиилээхтик сылдьан, үөрэн-көтөн кэлбиттэрэ, саха хоровой искусствотын историятыгар маҥнайгынан «Мелодия» фирма анал грампластинкатыгар уһуллан үөрдүбүттэрэ.
Василий Степанович педагог быһыытынан биир сүрүн уратыта аҥаардас ыллыырга эрэ үөрэтии буолбакка, оҕо киһи быһыытынан иитиллиитигэр ураты болҕомтото буолар. Эппиэтинэстээх, тэрээһиннээх, кэлэктииптээх буоларга үөрэтэрэ, гастролга, куонкуруска баралларыгар учебниктарын хайаан да илдьэ бараллара, улахаттар кыралары бэйэлэрин хонтуруолларыгар ылаллара — бу барыта бэйэни салайыныыны иитэрэ.
1987 сыллаахха ансаамбыл 15 сылынан бастакы буклета тахсыбыта, буклет тиэкиһин суруйар чиэс миэхэ тиксибититтэн астынабын. Элбэх докумуону, хаһыат суруйууларын үөрэтэн, бэйэм санаабар куһаҕана суохтук тахсыбыта. Василий Степанович талааннаах педагог буоларын оҕолор ыллыыр таһымнара уонна кэнники олоххо ситиһиилээх дьон буолан тахсыбыттара туоһулуур. Айылҕаттан айдарыылаах, ураты слухтаах үөрэтээччи оҕолору норуот ырыатын тэҥинэн академическай ырыаны толорорго үөрэттэ, аан дойду чулуу айымньыларын билэргэ, үрдүк таһымҥа толорорго уһуйда. Василий Степанович норуокка үтүөтэ биир бастакынан саха оҕото талааннааҕын, сайдыылааҕын Россия эрэ буолбакка, атын дойду идэлээх дьонугар билиһиннэрбитэ, дакаастаабыта, сөхтөрбүтэ буолар. «Кэнчээри» норуокка үтүөтэ улахан. Ол курдук, историяҕа бастакынан диэн ансаамбыл үлэтигэр элбэхтик иһиллэр.
Василий Степанович сэбиэскэй кэмҥэ иитиллэн, олоххо сыаннастара оччоттон баччаҕа диэри уларыйбаттар. Мин Василий Степановиһы айар куттаах личность быһыытынан ылынабын, оннук дьон — атыттар. Василий Степанович көнө, санаабытын аһаҕастык этэр. Тугу барытын ис сүрэҕиттэн ылынан оҥорор. Атыттартан эмиэ оннугу ирдиир. Бэйэтин уопутун атыттарга арыйарга куруук бэлэм, улуус музыка учууталларыгар методическай көмөнү оҥорор.
«Кэнчээриттэн» силис тардан, бүгүн улуус оҕото барыта ыллыыр диэтэххэ омун буолбат. «Музыка — барыбытыгар» бырайыак киириитин ис сүрэҕиттэн биһирии көрүстэ. Өр сылларга музыка оҕону иитэргэ сүдү суолтатын өрө тутан кэлбит киһиэхэ бу, кырдьык, сүҥкэн үөрүү. Василий Степановичка доруобуйаны, өссө да өр үлэлээн, «Кэнчээри» чуор куолаһынан дьону үөрдэ, сырдыкка, үтүөҕэ угуйа турдун.
Клара Троева,
Уус Алдан үөрэххэ управлениетын информационнай-методическай отделын салайааччыта
2015 сыл.