Ойор-тэбэр оҕом сааһым биир умнуллубат үтүө кэрэ түгэнэ «Кэнчээри» ансамбыл буолар. Кэрэ эйгэҕэ олох кыра сааспыттан уһуйааҥҥа сылдьарбыттан уһуйуллан сыанаҕа аан бастаан 5 сааспар тахсыбытым. Онтон алын сүһүөх кылааска музыкальнай оскуолаҕа үҥкүүгэ сылдьан иһэн ыллыырбын ордорон 4-с кылааска «Кэнчээри» ансамбылга хорга киирбитим. Аан бастаан хор ыллыырын истэн баран олус сөхпүппун өйдүүбүн, хаһан мин маннык ыллыыбыный диэн олус долгуйбутум. Аан бастаан Василий Степанович миигин истээри академически ыллатан көрбүтүгэр ыллаабыппар оҕолор күлбүттэрин өйдөөн хаалбыппын. Онтон хорга ыллыырбын сөбүлээн биир да күнү көтүппэккэ дьарыктанан 6 кылааска номнуо дьүрүһүтэн ыллыырга үөрэммитим. Чахчы да Василий Степанович туспа дьикти методиканан үөрэтэн ыллаабат да оҕону академически ыллатар профессионал педагогун сөҕөбүн, киэн туттабын. Мин хорга оскуоланы бүтэриэхпэр диэри 7 сылы быһа дьарыктанан билигин да Василий Степанович чочуйан оҥорбут куолаһа үйэн сааһын тухары хааларыттан сөҕөбүн. Ол курдук, атын да сиргэ ыллаатахха атын дьон истэн бу кэнчээри куолаһа диэн билэллэр, сөҕөллөр.
«Кэнчээригэ» ансамбылга сылдьан биһиги саҕана сотору-сотору араас кэнсиэрдэргэ, күрэхтэргэ, фестивалларга, гастролларга кыттарбыт. Ол курдук, ансамбылга сылдьар кэммэр Бүтүн союзтааҕы грампластинкаҕа уһулубуппутунан, «Артек» лааҕырга Бүтүн союзтааҕы оҕолор фестивалларыгар ситиһиилээхтик кыттан сынньанан кэлбиппитинэн, Новосибирск, Ленинград куоракка сылдьыбыппынан киэн туттабын уонна оҕо сааспар маннык умнуллубат түгэннэри бэлэхтээбитигэр убаастыыр, ытыктыыр салайааччыбар Василий Степановичка махталым муҥура суох.
Ансамбылга сылдьан аҥардас ыллыырга эрэ буолбакка, кэрэ эйгэҕэ уһуйуллан үрдүк култуураҕа, дьону кытта алтыһа үөрэнэргэ, эппиэтинэстээх, бэрээдэктээх, чөл куттаах, бэйэ санааны этэргэ, ситиһиилээх буоларга үөрэнэн киһи олоҕор олус элбэҕи ылынар, туһанар эбит.
Төрөппүт кыргыттарым Нарыйалаах Машам эмиэ кэрэ эйгэҕэ уһуйуллан Кэнчээригэ хорга сылдьан ансамбылларын олус үчүгэйдик саныыллар, ахталлар. Ыллыыр идэбин билигин да бырахпакка оскуолабар Василий Степанович тэрийбит «Далбар Хотун» ансамбыл, «Тойон Мүрү» Бороҕоннооҕу хор чилиэнэбин, солисткатабын.
Өссө төгүл тапталлаах «Кэнчээри» ансамбылым өрөгөйдөөх үбүлүөйүнэн эҕэрдэлээн туран инникитин да ансамбылбыт үүнэ-сайда, чэчирии турдун!!!
Ахтыыны суруйда 1988 сыллааҕы «Кэнчээри» ансамбыл выпускницата, солистката, Мүрү 1 нүөмэрдээх орто оскуола алын сүһүөх кылааһын учуутала, Мүрү нэһилиэгин сайдыытыгар, Уус-Алдан культуратын сайдыытыгар кылаатын иһин знактар хаһаайкалара, СР үөрэҕириитин туйгуна Васильева Евдокия Дмитриевна
2023